Gyzgyn - "ralli" teg entryler

Ralli-reýde gatnaşyjylar Altyn asyr Türkmen kölüne geldiler

gyzgyn — Fri, 14 Sep 2018 07:41:49 +0000

13-nji sentýabrda "Amul - Hazar 2018" awtorallisine gatnaşyjylar üçünji duralga - Garagumuň merkezinde ýerleşen "Altyn asyr" Türkmen kölüne geldiler. Ýaryşa gatnaşyjy toparlar "Altyn asyr" Türkmen köli" düşelgesine tarap ugrap, alaňlar we takyrlar köp bolan ýaryş ýoly boýunça 236 kilometr geçdiler.

"Amul - Hazar 2018" ýaryşynyň üçünji tapgyryna gatnaşan 46 ulagdan pellehana ilkinji bolup, däbe öwrülişi ýaly, Nani Roma we Aleks Haro geldiler. Ispanlylar ýoluň her aralygynda garşydaşlaryndan barha we barha arany açyp, aralyk hem-de umumy hasapda öňde barýarlar. Ýaryşyň şu tapgyrynda ikinji bolup pellehana 17 minut gijä galyp, Aýrat Mardeýewiň KAMAZY geldi. Emeli türkmen kölüne üçünji bolup, Miroslaw Zapletal hem-de onuň ýolbeledi Marek Sikora geldiler. Çehiýadan bolan jübüt umumy hasapda ikinji orny eýeleýär.

"Altyn asyr" Türkmen köli" düşelgesine gelensoňlar, ýaryşa gatnaşyjylary türkmen artistleri mähirli garşyladylar. Milli sazlar emeli kölüň töwereginde tebigatyň mukamy bilen täsin sazlaşykly utgaşdy. Ýaryşa gatnaşyjylar konsertden we milli türkmen tagamlaryndan lezzet aldylar.

Öňde täze gün hem-de ýaryşyň täze tapgyry garaşýar. Oňa gatnaşyjylar Balkan welaýatynyň çägine geçmeli bolar hem-de sebitiň çylşyrymly ýerlerinden aşmaly bolarlar. Ýöne, ýaryşa gatnaşyjylar täze badalga gününe çenli dynç alýarlar hem-de ajaýyp "Altyn asyr" Türkmen köli bilen tanyşýarlar.

Täze taryhy eýýamda daşky gurşawy goramak, şol sanda suw serişdelerini gorap saklamak we oýlanyşykly peýdalanmak wezipeleri döwlet syýasatynyň ileri tutulýan ugurlarynyň biridir. Häzir dünýäde ekologiýa meselesiniň ähmiýetine oňat düşünilýär. Şol meseleleri çözmezden, adamzat jemgyýetiniň mundan beýläkki durnukly ösüşini göz öňüne getirmek mümkin däl.

Türkmenistan halkara hyzmatdaşlygyna, bilelikdäki taslamalaryň amala aşyrylmagyna işjeň gatnaşýar. Şol taslamalar bütin adamzady tolgundyrýan möhüm ekologiýa meseleleriniň, ýagny suw we beýleki tebigy serişdeleri gorap saklamak hem-de dikeltmek, çölleşmä, ýerleriň ýaramazlaşmagyna garşy göreşmek, dünýä möçberinde howanyň ýylamagy, üýtgemegi ýaly meseleleriň çözülmegine gönükdirilendir.

Bu ulgamda ýurdumyz abraýly halkara guramalary, ilkinji nobatda, Birleşen Milletler Guramasy, Ählumumy ekologiýa gaznasy we beýleki düzümler bilen ýygjam gatnaşyk edip, Ýer ýüzüniň häzirki we geljekki nesilleriniň abadançylygynyň bähbidine bütindünýä ekologiýa meseleleriniň netijeli çözgütleriniň başlangyçlaryny öňe sürýär.

"Altyn asyr" Türkmen köli, hakykatdan-da, innowasion taslama bolup, ýurdumyzyň dünýäniň suw serişdelerini gorap saklamak bilen baglanyşykly umumadamzat meseleleri çözmäge uly goşant goşýandygyny subut edýär. Suwarylýan topraklaryň şorlaşmagy hem-de ýerasty suwlary sowmak meseleleri bilen gurak zolakda ýerleşen ýurtlaryň ählisiniň ýüzbe-ýüz bolýandygy hemmä mälimdir. Ekerançylygy üstünlikli alyp barmagyň hem-de suwdan peýdalanmagyň uly tejribesine eýe bolan Türkmenistan bu ulgamda ylmy-barlaglaryň öňbaşçysy bolup çykyş edýär hem-de beýleki döwletleri suw meselesine yhlasly garamaga çagyrýar.

Mälim bolşy ýaly, bu gidrotehniki ulgamyň ilkinji nobatdakysynyň ulanmaga berilmegi 2009-njy ýylyň 15-nji iýulynda hormatly Prezidentimiz Gurbanguly Berdimuhamedowyň gatnaşmagynda geçirildi. Türkmen kölüniň gurluşygy möhüm ykdysady we durmuş meseleleriniň toplumyny çözmäge gönükdirilendir.

Garagumda el bilen döredilýän köli gurmak boýunça iri möçberli we täsin taslamanyň durmuşa geçirilmegi döwlet Baştutanymyzyň üns merkezinde boldy. Milli Liderimiz bu ýerde ýaýbaňlandyrylan gurluşyk işleriniň barşy we netijeleri bilen yzygiderli tanyşdy. Netijede, Garagumda künjek döredildi. Ol çep kenardan şor suwlaryň Amyderýa akmagynyň öňüni almaga mümkinçilik berýär, geljekde bolsa Türkmenistanyň suwarymly ýerlerinden şor suwlaryň bu derýa akmagyny doly aradan aýyrmaga, ilatyň hojalyk zerurlyklary üçin kadaly şertleri we suw üpjünçiligini gowulandyrmaga hem-de Daşoguz welaýatynda suwarylýan ýerleriň melioratiw ýagdaýyny gowulandyrmaga mümkinçilik berer.

Şeýlelikde, ýurdumyzda suwuň ätiýaçlyk gory döredilýär. Ony geljekde tebigy taýdan arassalanmagy we döwrebap tehnologiýalaryň netijesinde oba hojalyk toplumynyň zerurlyklary - suw serişdelerini oýlanyşykly peýdalanmak, şor suwlaryny sowmak we topragyň şorlaşmak meselelerini çözmek, täze ýerleri özleşdirmek, öri meýdanlary giňeltmek, ekerançylyk ýerleri suwarmak, tehniki zerurlyklar üçin peýdalanyp bolar. Geljekde "Altyn asyr" Türkmen kölüniň döredilmegi emele gelen suw giňişligini hem-de sowujy zeý akabalaryny balyk senagatyny ösdürmek üçin peýdalanmaga mümkinçilik berer, köp babatda ýurdumyzyň howdan hojalyklarynda balykçylyk senagatynyň işini gowulandyrmaga ýardam berer.

Guşuçar belentlikden bary-ýogy birnäçe ýylda zeý akabalaryň ugrundaky ýerleriň tanalmaz derejede özgerendigi aýratyn göze ilýär. Şol ýerlerde az minerally suwlar bilen suwarmak üçin ýaramly bolan köp gumak ýerler bar. Ozallar bu ýerlerde diňe alaňlar bolupdy, häzir bolsa ýaşyl zolaklary peýda boldy, kölleriň özünde bolsa balyklaryň dürli görnüşleriniň peýda bolandygy hasaba alyndy. Maldarçylyk hem, şol sanda çölüň köp böleginiň suwlulandyrylmagynyň, öri meýdanlaryň giňeldilmeginiň hasabyna ösüşinde goşmaça itergi aldy.

Häzir "Altyn asyr" Türkmen kölüniň işlemegi Merkezi we Gündogar Garagumda zeý akabalarynyň ulgamynyň töwereklerinde göçüp-gonýan guşlar üçin täze oňyn ekologiýa we iým şertlerini döredýär, Daşoguz sowma akabasynyň hanasynyň ugrunda ýerleşen köller bolsa suwluk-batgalyk ýerlerde mesgen tutan ördekleri, gazlary, sakarbalaklary, jübtenleri, çuluklary we beýleki guşlary özüne çekýär.

Bu ýerde eýýäm höwürtgelemek we gyşlamak üçin täze ýerleriň ençemesi peýda boldy. Garagumuň merkezi böleginiň suwlulandyrylmagy seýrek duşýan toýnakly haýwanlaryň - üstýurt dag goýnunyň, gulanlaryň, jerenleriň köpelmegine oňat täsir edýär. Şol jandarlaryň köpüsi Türkmenistanyň Gyzyl kitabyna girizildi. Kölleriň kenarlarynda mesgen tutýan haýwanat dünýäsiniň wekilleriniň sany hem artýar.

Garagumda ösümlik dünýäsiniň 293 görnüşiniň, şol sanda ösümlikleriň 210 görnüşiniň ösýändigi bellärliklidir. Şolaryň köpüsi bejeriş häsiýetine eýe bolup, hormatly Prezidentimiz Gurbanguly Berdimuhamedowyň "Türkmenistanyň dermanlyk ösümlikleri" atly düýpli ylmy işinde beýan edildi. Milli Liderimiziň Garagum sährasynyň täsin zolaklaryny gorap saklamak hem-de dünýäde wagyz etmek meselelerine aýratyn üns bermegi netijesinde, ýurdumyzda ony ÝUNESKO-nyň Bütindünýä mirasynyň sanawyna girizmek boýunça möhüm işler alnyp barylýar.

Milli Liderimiziň başlangyjy bilen döredilen "Bereketli Garagum" täze döwlet goraghanasyny hem şu wezipeleriň çözülmegine gönükdirilendir. Ol Garagumuň ekoulgamynyň ilkibaşky we biraz üýtgän görnüşlerini ylmy esasda gorap saklamak, çöl we ýarym çöl zolaklarda goraghana işiniň esaslaryny işläp taýýarlamak, bu ulgamda halkara gatnaşyklaryny giňeltmek babatda nusga bolar.

"Amul - Hazar 2018" ralli-reýdine gatnaşyjylar "Altyn asyr" Türkmen köli" düşelgesinden ýaryş ýolunyň dördünji bölegi boýunça "Sport meýdançasy" düşelgesine ýola düşerler. Bu düşelge emeli kölden 409 kilometrlikde, Balkan welaýatyndaky Gamyşlyja diýen belentlikde ýerleşýär. Bu tapgyrda ýaryşyň geçmeli ýoly 244 kilometre deňdir.

Bu tapgyrda-da ýaryşa gatnaşyjylara ýene-de synag garaşýar. Milli Liderimiz Gurbanguly Berdimuhamedow Hazarýaka sebitinde Garagumuň çägesiniň aýratyn fiziki häsiýetlere eýedigini, munuň bolsa sürüjiden tizligiň kesgitli bir ýagdaýyny saýlamak başarnygyny talap edýändigini synag ýaryşlary döwründe belledi.

Şeýle kynçylyklara kimiň hötde gelip biljekdigini nobatdaky tapgyryň netijeleri görkezer.

Berdimuhamedowyň Amul-Hazar 2018 awtoralli açylyş çykyşy

gyzgyn — Wed, 12 Sep 2018 07:32:32 +0000

ÝER: Türkmenabat şäheri
TARYH: 10 sentýabr 2018

Hormatly adamlar!
Hormatly awtomobil sportunyň türgenleri!
Hanymlar we jenaplar!
Gadyrly "Amul - Hazar 2018" halkara awtorallisine gatnaşyjylar!

Ine, biz şu gün "Amul - Hazar 2018" ady bilen geçirilýän halkara derejesindäki sport baýramçylygyny geçirýäris. Türkmen topragynda guralýan ýaryşlara gatnaşmak üçin daşary ýurtlardan gelen türgenlere we beýleki myhmanlara "Hoş geldiňiz!" diýip ýüzlenýäris.
Men siziň ähliňizi Garaşsyz, Bitarap Türkmenistanda geçirilýän halkara awtorallisiniň başlanmagy bilen tüýs ýürekden gutlaýaryn.
Siziň bilşiňiz ýaly, Amul topragyndan badalga berilýän halkara awtoralli ýaryşlary ajaýyp Hazaryň kenarynda ýerleşýän gözel künjekde- Awazada jemlener.
"Türkmenistan - Beýik Ýüpek ýolunyň ýüregi" diýlip yglan edilen ýylda "Amul - Hazar 2018" halkara derejeli awtoralli ýaryşynyň geçirilmegi Türkmenistanyň dünýä awtomobil sportunyň ösdürilmeginde mynasyp orun eýeleýändigini äşgär edýär. Biziň ýurdumyzda awtomobil sportunyň döredilenine köp wagt geçmedigem bolsa, bu ugurda giň möçberli işler amala aşyryldy.

Hormatly adamlar!
Gadyrly türgenler!

Ertir gadymy Amul topragyndan halkara awtoralli ýaryşy bolan sport baýramçylygyna dabaraly ýagdaýda badalga bereris. Bu uly ýaryşlara taýýarlygyň çäklerinde halkara awtoralliniň geçjek ugurlary kesgitlenildi.
Bu menziliň - Amuldan Hazara çenli bolan ýoluň umumy uzynlygy 1571 kilometre barabardyr.
Hormatly türgenler, siz bäsleşigiň dowamynda dünýäniň iň uly çölleriniň biri hasaplanylýan Garagumuň baý tebigaty, onuň özboluşly aýratynlyklary hem-de türkmen sährasynyň täsinligi bilen tanşarsyňyz. Garagumuň özboluşly tebigatynyň, onuň ösümlik we haýwanat dünýäsiniň sizde ýatdan çykmajak täsirler galdyrjakdygyna ynanýaryn. Lebap welaýatynyň çäginde ýerleşýän Badalga meýdançasyndan ugrap, gadymy Amul topragynyň ajaýyplygyny duýarsyňyz.
Sebitde iň uly gadymy Jeýhun derýasy Beýik Ýüpek ýolunyň ugrunda ýerleşip, onuň kenaryndaky taryhy galanyň ösen medeniýetli şäher bolandygyny taryh ykrar edýär. Bu ýerde ekerançylyk we söwda gatnaşyklary gülläp ösüpdir.
Soňra halkara awtoralliniň ýoly bilen Mary welaýatynyň çäginde ýerleşýän "Mary düşelgesi" diýen künjege bararsyňyz. Mälim bolşy ýaly, gadymy döwürde Maru - Şahu - Jahan ady bilen belli bolan bu şäheriň irki asyrlarda diňe bir sebit ähmiýetli däl, eýsem, dünýä siwilizasiýasynyň merkezi bolandygyny taryhy - ylmy çeşmeler tassyklaýar. Gadymy Merwiň dünýä medeniýetiniň pajarlap ösmeginde möhüm orun eýeländigine taryh şaýatdyr. Bu barada dünýäniň gadymy taryh bilen meşgullanýan alymlary, taryhçylary belleýärler.
Beýik Ýüpek ýolunyň ugry boýunça guralýan halkara awtoralliniň ýoly Ahal welaýatynyň çägine girer. Bu ýerde "Garagum ýalkymy" düşelgesi ýerleşýär. Şonda siz sähranyň bu künjeginiň gözelligine, onuň tebigy aýratynlyklaryna hem-de çöl ösümlikleriniň özboluşly görnüşlerine syn edersiňiz.
Dünýä ýüzünde özboluşly täsinlik hasaplanylýan we "Garagum ýalkymy" diýlip atlandyrylýan bu ýerdäki alaw sizi haýran galdyrar. Garagumuň jümmüşindäki alaw türkmen halkynyň kalbynyň ýyly mähriniň özboluşly nyşany bolup, ol siziň göwnüňizi göterer.
Mundan başga-da, bu künjekleriň howa gurşawy, ösümlik dünýäsi sizi täze menzillere atarar.
Soňra siz taryhy ýol bilen gidip barşyňyza Daşoguz topragyna gadam goýarsyňyz. "Amul - Hazar 2018" halkara awtoralliniň ýoly "Altyn asyr - Türkmen köli" diýlip atlandyrylýan düşelgäniň üstünden barar. Bu ýerde siz altynsow öwüşginli ýaýylyp ýatan köli görersiňiz. Garagum sährasynyň jümmüşinde dörän bu kölüň we onuň töwerekleriniň özboluşly haýwanat we ösümlik dünýäsi Sizi adam eli bilen döredilen gudratyň dünýäsine aralaşdyrar. Bu künjegiň ýakymly gurşawy we kölüň kümüş teňňeli balyklary size şatlyk eçiler.
Şeýlelikde, Garagum sährasynyň täsin tebigaty, onuň rowaýata öwrülen künjekleri we sähranyň döreden gudratlary hiç bir adamy biparh goýmaýar.

Hormatly türgenler!

Soňra siziň ýoluňyz Balkan welaýatynyň çägi boýunça dowam eder. Şonda siz seleňläp görünýän Balkan daglarynyň deňinden geçip, ýaryşyň jemleýji tapgyryna tarap rowana bolarsyňyz. Türkmen topragynyň, sährasynyň, kölleriniň, daglarynyň ajaýyplygy bilen geçen ýoluňyz Balkan welaýatynyň çäginde ýerleşýän "Sport meýdançasy" diýlip atlandyrylýan düşelgä barar.
Şeýlelikde, ady rowaýata öwrülen halkara awtoralliniň ýoly gojaman Hazaryň kenary bilen uzap, Aziýanyň şypahana merjeni hasaplanylýan "Awaza" milli syýahatçylyk zolagynda jemlener. Bu ýerde siz adamlaryň dynç almagy we saglyklaryny berkitmekleri üçin niýetlenen şypahana zolagynyň aýratynlygyny synlarsyňyz. Türkmen topragynda amala aşyrylan beýik işleriň şaýady bolarsyňyz. Bu künjegiň ajaýyplygy, halkymyzyň ýagşy dessurlary we myhmansöýerlik däbi siziň hakydaňyzda hemişelik saklanar.

Hormatly türgenler!
Men ykballaryny sport bilen baglan türgenlere uly üstünlik arzuw edýärin.

Hormatly adamlar!
Gadyrly türgenler!

"Amul - Hazar 2018" halkara awtoralli ýaryşlarynyň halklary ýakynlaşdyryp, dostlugy, hyzmatdaşlygy has-da berkitjekdigine ynanýaryn.
Siziň ähliňizi bu ajaýyp hem-de özüne çekiji sport baýramçylygy bilen ýene bir gezek tüýs ýürekden gutlaýaryn.

Hormatly türgenler!
Ýoluňyz ak bolsun, tutumyňyz rowaç, üstünlik hemraňyz bolsun!

Dünýä Awtomobil ussatlary Türkmenistana gelýärler

gyzgyn — Sun, 09 Sep 2018 08:33:02 +0000

7-nji sentýabrda paýtagtymyzyň howa menzilinde Pariž — Aşgabat ugry boýunça uly wekiliýet geldi.
Olaryň düzüminde “Amul — Hazar 2018” awtorallini bilelikde guraýjy fransuz kompaniýasynyň wekilleri, hatarynda Beýik Britaniýadan, Çehiýa Respublikasyndan we beýleki ýurtlardan meşhur sürüjiler bolan ýaryşa gatnaşyjylar hem-de bu ýaryşlary beýan etjek žurnalistler — umuman, 117 adam bar.

Hormatly Prezidentimiz Gurbanguly Berdimuhamedowyň başlangyjy boýunça amala aşyrylýan awtoulag ýaryşynyň täze taslamasy dünýäniň sport jemgyýetçiliginiň uly ünsüni çekdi. Munuň şeýle bolmagyna ýurdumyzda we daşary ýurtlarda geçirilen tanyşdyrylyş çäreleri ýardam berdi. Ýaryşlaryň guralmagyna meşhur “Africa Eco Race” ralli ýaryşynyň baş direktory Žan-Lui Şlesser hem gatnaşýar.

Türkmenistanyň Prezidenti Gurbanguly Berdimuhamedowyň bu ýaryşlary geçirmek pikirini diňe bir öňe sürmegi däl, eýsem-de, guramaçylyk meselelerinden başlap, anyk hereketlere çenli onuň durmuşa geçirilmegine hut özüniň howandarlyk etmegi bu iri möçberli awtosport taslamasyna aýratyn dereje berýär. Döwlet Baştutanymyzyň hut özi ýolsuz ýerlerde sürülýän sport ulagynyň sürüjisi hökmünde Garagum sährasynda awtomobil ýaryşynyň geçjek ýollaryny synag etdi.

Şeýlelikde, Türkmenistanda awtoulag ýaryşy Lebap welaýatynda 11-nji sentýabrda badalga alýar. Şol günüň öňüsyrasy ol ýerde uzynlygy 1500 kilometr bolan Amul — Hazar ugry boýunça ralliniň açylyş dabarasy geçiriler.

Ýoluň ugrunda ýaryşa gatnaşyjylaryň oňaýly dynç almagy, tehniki işler we medeni çäreler üçin duralgalaryň 4-si gurnaldy. Döwrebap tehnikalar, howa ulaglary hem-de ralliniň ýany bilen gitmek we onuň geçişini ýaýlymlarda beýan etmek üçin beýleki ugurdaş serişdeler guramaçylaryň ygtyýaryna berildi.

Daşary ýurtly myhmanlary ýokary derejede kabul etmek ýurdumyz üçin hemişe abraýly iş bolup geldi. Parižden gelen wekiliýetiň türkmen topragyna gadam uran ilkinji minutlary hem munuň subutnamasy boldy. Olary Aşgabadyň Halkara howa menzilinde myhmansöýerlik bilen kabul etdiler.

Öňde boljak çärelere gatnaşyjylaryň pikirlerini paýlaşyşy ýaly, paýtagtymyzyň esasy howa derwezesiniň keşbi olarda uly täsir galdyrdy. Ýerden göterilip, uçmaga hyýallanýan we asmana göterilip barýan guşa çalymdaş howa menziliniň äpet uly keşbi uzaklardan görünýär. Onuň heniz taslama döwründen başlap, Merkezi Aziýa sebitinde iň iri desga hökmünde ykrar edilendigi ýöne ýerden däldir. Ýöne, onuň diňe bir gerimi haýran etmeýär — Halkara howa menziliniň tehniki taýdan enjamlaşdyrylyşy, onuň hemmetaraplaýyn döwrebaplygy hem-de içki bezegleri türkmen topragynyň myhmanlaryna diňe ajaýyp duýgulary bagyş etdi.

Ýolagçy terminalynyň binasyndaky işewürlik zolagy hem hyzmatlaryň iň ýokary ölçeglerine kybap gelýär, bu ýerde hemme zerur işleri (uçara münmäge tiz bellige almak, gümrük we pasport gözegçiligi) tiz ýagdaýda geçip bolýar. Garaşylýan owadan zalda myhmanlara sowujak miwe suwlary, çaý, kofe hödürlenilýär. Olar şeýle hem “şwed stolundan” peýdalanyp biler, ter miweleri we süýji önümleri buýrup bilerler. Wi-Fi-a erkin elýeterlilikden başga-da, işewür adamlar üçin zerur bolan hyzmatlar hem-de degişli guramaçylyk tehnikalary (faks, printer, kseroks, skaner) göz öňünde tutulandyr.

Işewürleriň iş tertibinde her bir minutyň hasaply bolany sebäpli, olar gepleşikleriň öň ýanynda myhmanhana girmezden, özlerini gerekli tertibe getirip biler. Oňaýly ýumşak mebeli bolan dynç alyş otagy hem bolup, onda telewizor görmek bolýar, şeýle hem bilýard oýnalýan ýer we elbetde, eneler we çagalar üçin zerur bolan otag, namaz okar ýaly ýer bar.

Paýtagtymyzyň Halkara howa menzilinden myhmanlar ýol polisiýasynyň BMW i8 elektrokar ulaglarynyň ugratmagynda ýerli uçuşlaryň amala aşyrylýan howa menziline getirildi. Bu ýerden olar tiz wagtda Türkmenabat şäherine uçdular. Ol ýerden Beýik Ýüpek ýolunyň taryhy ugry boýunça guralýan ralli ýaryşynyň başy başlanar.

Ozallar bu ýerlerden gülläp ösen şäherleriň arasynda ýaýlyp giden çäge ummanlaryny kesip geçýän kerwen ýollary geçen bolsa, häzirki döwürde bu ýerde birinji derejeli awtoýollar we täze demir ýollar çekildi, iň häzirki zaman howa menziliniň toplumlary guruldy. Töweregiň tebigy gurşawyna goşulmak bilen bularyň ählisi myhmanlarymyza Beýik Ýüpek ýolunyň bir wagtyň özünde geçmişini we häzirki döwrüni göz öňüne getirmäge ajaýyp mümkinçilik bagyşlaýar. Bu ýol häzirki döwürde hormatly Prezidentimiz Gurbanguly Berdimuhamedowyň işjeň tagallalary hem-de netijeli halkara syýasaty, diplomatiýasy netijesinde ýurtlary we halklary birleşdirip, täzeden dikeldilýär.

Ilkinji ralliçiler gadymy Amulda

durdy — Sat, 08 Sep 2018 04:11:47 +0000

“Amul ― Hazar 2018” halkara awtorallisiniň başlanmagyna indi sanlyja sagatlar galdy. Öňümizdäki hepde türkmen topragynda geçiriljek halkara awtoralli ýaryşynyň şanly wakalary bilen taryha girer. Ýaryşyň badalga beriljek şäheri ― Türkmenabat düýn ilkinji daşary ýurtly myhmanlaryny kabul edip başlady.
Ozal hem habar berlişi ýaly, halkara awtoralla 11-nji sentýabrda hut şu şäherden badalga berler. Gündogar sebitiň merkezi şäherine gelen ilkinji myhmanlaryň arasynda Gazagystanyň “MobilEx racing team” toparynyň wekilleri hem bar.
Halkara ralli ýaryşlaryna ozal hem birnäçe ýola gatnaşan topar Garagum sährasyna “Toyota” kysymly sport ulaglary bilen çykar. Toparyň düzüminde Gazagystanyň awtomobil sporty federasiýasynyň ýolbaşçysy Marat Akbarow, belli ralliçi Kanat Şagirow, onuň ogly Ýerdan Şagirow hem-de Kirill Çernikow ýaly ralli dünýäsiniň görnükli wekilleri bar.
Düýn “MobilEx racing team” toparynyň wekilleri sport ulaglarynda Amyderýanyň üstünden geçýän Türkmenabat ― Farap awtomobil köprüsine, şäheriň gözel ýerlerine we “Ak ýol” binasynyň töweregine gezelenç etdiler. Gazagystanyň Aktau şäherinden gelen toparyň agzalary Türkmenistanda geçiriljek halkara ýaryşa gatnaşmaga örän şatdygyny aýdyp, “Amul ― Hazar 2018-iň” özleri üçin täze, özi hem täsirli başdangeçirmeleri bagyşlajakdygyna ynam bildirdiler.
Topar halkara ýaryşa sport ulaglarynyň dördüsi bilen gatnaşar. “Olaryň ählisi hem Türkmenistana getirilmeziniň öňüsyrasynda çöl ― sähra şertlerinde geçiriljek ýaryşa laýyk derejede abatlanyldy. Käbir enjamlar bolsa goşmaça oturdyldy” diýip, toparyň metbugat wekili gürrüň berýär. Ýeri gelende aýtsak, “MobilEx racing team” diňe ýaryşa gatnaşmak bilen çäklenmän, bu ýaryşyň iň gyzykly pursatlaryny gazak telewideniýesinde şöhlelenmegini hem üpjün eder. Toparyň wekilleriniň aýdyşy ýaly, Gazagystanda ralli ýaryşlarynyň muşdagy juda kän. Olar Türkmenistanda geçiriljek ýaryşyň netijelerine sabyrsyzlyk bilen garaşýarlar.
Ýeri gelende aýtsak, “Amul ― Hazar 2018” halkara awtorallisine meşhur gazak toparyndan başga-da, X-Raid Mini, PH Sport, SRT Racing, RT Off Road Racing, Off Road Kazakhstan, Jazz Tech Off Road, Kamaz Master, Maz Sport Auto, Gaz Raid Sport ýaly dünýä belli toparlar gatnaşýarlar. Umuman, ýaryşa gatnaşjak 23 halkyň wekilleriniň arasynda Fransiýa, Italiýa, Russiýa, Çehiýa, Çili ýaly ralli ýaryşlaryna uly üns berýän döwletleriň wekilleri hem bolar.
“Amul ― Hazar 2018” halkara awtorallisiniň myhmanlary Türkmenabadyň Halkara howa menziliniň myhmanhanasynda ýerleşdirilýär. Lebap welaýat köpugurly bazarynyň giň awtoulag duralgasy bolsa ýaryşa gatnaşjak ulaglar üçin duralga we abatlaýyş merkezi bolup hyzmat edýär. Ýaryşa gatnaşyjy daşary ýurtly myhmanlaryň agramly böleginiň Türkmenabada şu gün gelmegine garaşylýar.

ÇEŞME: turkmen portal

Berdimuhamedowa Amul-Hazar rallisi üçin şahadatnama berildi

semiz-we-aynekli — Wed, 05 Sep 2018 01:44:14 +0000

Içeri işler minitri Isgender Mulikow 31-nji awgustda prezident Gurbanguly Berdimuhamedowa “Amul-Hazar” rallisine gatnaşmgy üçin sürüjilik şahadatnamasyny hem-de sport awtomobiliniň tehniki pasportuny gowşurdy.
Sürüjilik şahadatnamasy baryp 10-njy iýunda berildi, emma döwlet baştutany ony diňe häzir alýar.
Haýsy sport maşynynyň tehniki pasporty berildi, prezidentiň öz çyzgysy esasynda täzeden gurnan awtoulagynyňkymy ýa-da başga, habarda anyklaşdyrylmýar.
Şeýle-de döwlet baştutanyna ýaryşlara gatnaşýan sürüjiler üçin sport lybaslary toplumlarynyň nusgalary görkezildi.
Soňra prezident “Amul-Hazar 2018” awtorallisine gatnaşýanlaryň awtoulaglaryny we tehnikalaryny millin dizel ýangyjy we benzin bilen mugtuna üpjün etmek baradaky karara gol çekdi.
Türkmenistandan bu ýaryşa IIM-niň awtosport merkezine we Awtosport boýunça milli federasiýa degişli 15 komanda wekilçilik eder. Ekipažlar Nissan Patrol, Mitsubishi L 200, Chevrolet, Toyota Hilux, Toyota Lancruzer 200 markaly maşynlarda we kawdrosikl we ýük maşynlary (MAN) kysymlaryndaky awtoulaglarda ýaryşa gatnaşarlar.

-Türkmenistandaky “Amul-Hazar” rallisi 9-14-nji sentýabr aralygynda geçiriler. Döwlet baştutany hem iýulda özüniň ýaryşa gatnaşjakdygyny syzdyrdy.
-Prezident Berdimuhamedow 26-njy awgustda, ralliden öň, bir hepdede ikinji gezeke türgenelik geçdi we täze maşyny synagdan geçirdi.
-Ýaryşyň ýeňijilerine türkmen milli lybaslaryny, şeýle-de V Aziýa oýunlarynyň nyşanyny – Wepaly alabaýyň şekilini sowgat bererler.

http://i.hizliresim.com/Z36pgk.jpg
http://i.hizliresim.com/vPGVdp.jpg
http://i.hizliresim.com/PDdN47.jpg
http://i.hizliresim.com/BznNXG.jpg
http://i.hizliresim.com/lZXpYp.jpg

Türkmenistandaky ralli, weloýaryş we ylgaw bäsleşigi 26-njy fewralda başlanar

nazaroff — Fri, 26 Jan 2018 14:05:31 +0000

Türkmenistanyň prezidenti Gurbanguly Berdimuhamedow 12-nji ýanwarda “Amul-Hazar 2018” atly halkara awtoralli, welosiped we ylgaw ýaryşlaryny geçirmek boýunça guramaçylyk toparyny döretmek baradaky karara gol çekdi.
Karar esasynda Sport baradaky döwlet komitetine degişli ministrliklere, pudak edaralaryna, welaýatlaryň we Aşgabat şäheriniň häkimlikleri bilen bilelikde, “Amul-Hazar 2018” atly halkara awtoralli, welosiped we ylgaw ýaryşlaryny geçirmegiň tertibini bir aý möhletde işläp taýýarlamak we tassyklamak tabşyryldy diýip, TDH döwlet habar gullugy habar berýär.
26-njy fewralda Türkmenistanda birbada üç sany sport ýaryşy: “Amul-Hazar 2018” halkara awtoralli, weloýaryş we ýeňil atletikaçylaryň bäsleşigi başlanar.
Ralli we ýeňil atletikaçylaryň ýaryşy 15-nji sentýabrda, Türkmenbaşy şäherinde tamam bolar diýip, TDH döwlet habar gullugy habar berýär.
Belleýäris, bu çärelere görülýän taýýarlyklar prezident Gurbanguly Berdimuhamedowyň hut öz gözegçiliginde saklanylýar, ol golaýda ýaryş geçirmegiň estafeta taýagynyň nusgalaryny hem tassyklady.

ÇEŞME: Türkmenistanyň Hronikasy