Gyzgyn - "istanbul" teg entryler

Stambulda ýogalan türkmenistanly Maral Klyçewa hossar gözlenýär

josgun — Sat, 23 Jun 2018 08:24:38 +0000

Sosial mediada türkmenistanly migrantlaryň ýaýradýan bildirişlerinde Stambulda ýogalan daşoguzly migrant zenana hossar gözlenýändigi habar berilýär we merhumyň Türkmenistanyň biometriki bolmaýan köne pasporty bilen türk keselhanasy tarapyndan berlen ölüm habarnamasy halk köpçüligine görkezilýär.
Stambulyň Medeniýet uniwersitetiniň Göztepe ylmy-barlag keselhanasy tarapyndan taýýarlanan ölüm habarnamasynda, Türkmenistanyň raýaty, Daşoguz welaýatynyň ýaşaýjysy we 1968-nji ýylda doglan Maral Kylyçewanyň 12-nji iýunda aradan çykandygy we Türkiýede kanuny ýagdaýynyň bolmandygy beýan edilýär.
Resminamada türkmen migrant zenanynyň ölüm sebäbiniň ýokanç kesel sebäpli bolmandygy üçin bedeniniň hem barlagdan geçirilmän, morga iberilendigi ýazylypdyr.
Türkiýedäki Türkmen habar gulluklary merhum türkmen migrant zenanynyň ykbaly bilen gyzyklanyp, Stambulyň Medeniýet uniwersitetiniň Göztepe ylmy-barlag keselhanasyndan maglumat almaga synanyşdy. Emma keselhananyň işgärleri telefonda merhumlar barada hiç kime jikme-jik maglumatyň berilmeýändigini, diňe hossarlary ýüz tutanda, olara şeýle maglumatyň berilýändigini aýtdylar.
Ýogalan daşoguzly zenanyň bir öýde bile ýaşan obadaşynyň aýtmagyna görä, merhum owal iki gezek damarlaryny açdyran ekeni.

MARAL KLYÇEWANYŇ Pasporty: http://i.hizliresim.com/lZrjll.jpg

Türkmenistandan daşary ýurda çykmak günbe gün kynlaşýar

durdy — Wed, 13 Jun 2018 03:11:06 +0000

Türkmenistan garaşsyzlygyny alandan soň, başda Türkiýe bolmak bilen Russiýa Federasiýasy, Ukraina, Belarus hem ÝB-niň ýurtlaryna ýokary okuw jaýlarynda okamaga gidýänleriň köpelendigi aýdylýar.
Daşary ýurtlarda ýokary bilim alýan türkmenistanly studentleriň käbiriniň dynç alyş ýa-da başga saý-sebäp bilen öýüne dolananlarynda, yzyna goýberilmeýändigi aýan bolýar. Daşary döwletlere syýahat etmek isleýän türkmen raýatlaryna Aşgabadyň aeroportyň migrasiýa gullugy tarapyndan gadagançylyklaryň artýandygyny ýaşaýjylardan eşitse bolýar.
13-nji fewral 2018-de hiç hili sebäp aýdylman Aşgabatdan Stambula uçýan uçara ortaça 70 ýolagçy goýberilmedi. Şonda aglabasy lebaply we daşoguzly zenanlardan kiçi göwrümdäki protest çäresini geçirdiler.
Hat-da 2018 Aprel aýynda Daşoguz welaýatynyň ýaşaýjysy, Stambula gidýän halkara uçara üç gezek goýberilmedik raýat öz janyna kast etdi.
Daşoguz welaýatynyň Akdepe etrabynda ýaşaýan erkek üç gezek Türkiýä gitmäge synanyşdy, emma bu başa barmady. Üçünji gezek hem uçardan alyp galanlaryndan soň, oňa ýurtdan hiç wagt goýberilmejegini aýtdylar. Ol şondan soň öz öýüniň işigindäki daragtdan özüni asdy. Ol bergi-borja batyp, bilet satyn aldy, emma bergisini yzyna gaýtaryp bilmedi we bu onuň özüni heläklemegine sebäp boldy.
“Ol gün-güzeranynyň ýaramazlaşmagy sebäpli çagalaryny bir wagtyna hem naharlap bilmeýär. Çagalarynyň mekdebe ýyrtyk egin-eşikde gatnamagyna namys edip, uly prosentine karz pul alyp, Türkiýä gazanç etmäge gitmekçi bolýar. Emma onuň bu synanyşygy başa barmansoň, alan karzyny üzüp bilmejegini bilip, ‘garyplykdan we işsizlikden ýadadym’ diýen ýazgy galdyryp, öz janyna kast edýär” diýip merhumyň garyndaşy habar berýär.
Ýatladyňyza düşse, öňem 28-nji maýda Aşgabatda bir aýalyň migrasiýa gullugynyň işgäri bilen bolan dawadan soň heläk bolupdy. Ol aýal hem Türkiýä gidýän uçara goýberilmändi. Şondan iki gün soň prezidentimiz Gurbanguly Berdimuhamedow Döwlet migrasiýa gullugynyň başlygy Mergen Gurdow-a berk käýinç beripdi.

ÇEŞME: Türkmenistanyň Hronikasy

Türkiýe aprel aýyndan başlap Türkmen raýatlaryna wize bermegi/uzaltmagy ýatyrdy

nazaroff — Sun, 27 May 2018 23:34:57 +0000

Stambulyň migrasiýa edarasy aprel aýyndan bäri Stambulda turistik ýaşaýyş rugsadyny almak ýa-da şeýle görnüşde alan ýaşaýyş rugsadynyň möhledini uzaltmak isleýänleriň arzalaryny yzyna gaýtaryp başlady.
Bu ýagdaý Stambuldaky türkmen zähmet migrantlaryny çykgynsyz ýagdaýa salýar we ýaşaýyş rugsadyny alyp bilmeýän türkmenistanly raýatlaryň käbiri indi günbatar ýurtlaryna bikanun migrantlyga gitmegiň ýoluny gözlemäge başlady.
ÇEŞME: Türkmenistanyň Hronikasy

Stambulda işleýän Türkmen raýaty iki adamy çekiçläp öldürdi

nazaroff — Thu, 21 Dec 2017 00:19:48 +0000

Stambulyň polisiýasy 19-njy dekabr 2017-de Türkmenistanyň 30 ýaşyndaky raýaty Gurtgeldi K.-ny tussag etdi. Ol iki adamy öldürmekde gümän edilýär.
Türkiýäniň SonDakika neşiri habar berilmegine görä, Gurtgeldi 11-nji dekabrda Türkiýäniň raýaty Rukiye Baljy (51) we Gürjistanyň raýaty Ymawerdi Kazymowyň (61) ýanynda Türkiýäniň Büýükçekmeje etrabynda işe başlaýar. Şol gün agşam Gurtgeldi bu iki adamy öldüripdir. 11-nji dekabr 2017-de bolan ganhorlygyň sebäbi öý eýesi bolan aýal Gurtgeldä öz jaýynda gije galmaga rugsat bermänligi diýip aýdylýar. Ýagny, agşam işi gutaransoň Gurtgeldi galmaga ýeriniň ýokdygyny olaryň ýanynda galmak isleýändigini aýdýar. Ýöne Ymawerdi Kazymow muňa rugsat berip bilmejegini aýdýar. Bu sebäpli Gurtgeldi we Imawerdi arasynda söz dalaşy çykýar we Gurtgeldi çekiç bilen Ymawerdiniň kellesinden batly urýar. Ymawerdi şol bada ýere ýykylyp ölýär. Muny gören Rukiye Baljy bolsa polisiýa habar etjek bolýar welin Gurtgeldi ony hem çekiçläp öldürýär. Bu ganhorlyk eden soň, Gurtgeldi pidalaryň ikisiniň hem mobil telefonyny alyp gaçýar.
Polisiýa telefon signallaryny yzarlamana synanşýar. Ýapyk duran telefondan ilkinji signal 18-nji dekabr 2017-de gelýär, polisiýa signalyň gelen ýeriniň bir ikinji-el ulanylan telefon dükanydygyny anyklaýar. Dükan eýeleriniň aýtmagyna görä Gurtgeldi telefonlary bu dükana satan eken. Polisiýa Gurtgeldiniň yzyny şol dükanda oturdylan wideo gözegçilik ýazgylary barlap tapdylar.
Neşiriň maglumatyna görä, Gurtgeldi jenaýat edendigini boýun aldy.

ÇEŞME: https://www.sondakika.com/haber/haber-balyozla-iki-kisiyi-oldurdugu-belirlenen-supheli-10361655/