Gyzgyn - "baslesik" teg entryler

«Älemiň hanymy» bäsleşigi Gyrgyzystandan ötünç sorady

gyzgyn — Thu, 19 Jan 2023 18:40:21 +0000

«Älemiň hanymy» bäsleşigiň guramaçylary ýurduň adyny dogry aýdyp bilmändigi üçin Gyrgyz Respublikasyndan we onuň wekilinden ötünç soradylar. Bu barada «Gazeta.ru» ýazýar. «Älemiň hanymy» bäsleşiginiň ýolbaşçysy Emi Emmerih bäsleşigiň alypbaryjysynyň deslapky tapgyrda «Gyrgyzystan» diýip dogry aýdyp bilmändigini we tomaşaçylara ýurduň wekiliniň mynasyp yglan edilmändigini nygtap: «Bize has gowy işlemek gerek. Bu aklap bolmajak ýalňyşlyk, şonuň üçin ötünç soramak isleýäris» diýdi. «Älemiň hanymy» bäsleşiginde Gyrgyzystana wekilçilik eden 18 ýaşly Altynaý Botoýarowa ötünji kabul edýändigini aýdyp, guramaçylaryň bu meselä çynlakaý üns berendikleri üçin minnetdarlyk bildirdi. Täze Orlean ştatynda geçen «Älemiň hanymy» gözellik bäsleşigine dünýäniň 86 ýurdunyň wekilleri gatnaşdy. Bäsleşikde ABŞ-nyň wekili R’Bonni Gabriel ýeňiji boldy. Surat: absatz.media

«Ýylyň göreldeli wagyzçysy» bäsleşiginiň ýeňijileri belli boldy

gyzgyn — Thu, 19 Jan 2023 18:40:00 +0000

Türkmenistanyň Demokratik partiýasynyň Syýasy Geňeşi tarapyndan geçirilýän «Ýylyň göreldeli wagyzçysy» bäsleşiginiň ýeňijileri belli boldy. Has takygy, bäsleşikde Türkmenistanyň Daşary işler ministrliginiň Halkara gatnaşyklary institutynyň uly mugallymy Perhat Çaryýew ýeňiji boldy. Bu barada ýokary okuw mekdebiniň resmi web-saýtynda habar berilýär. Ýeri gelende bellesek, Türkmenistanyň Demokratik partiýasynyň Syýasy Geňeşi tarapyndan her ýyl yglan edilýän «Ýylyň göreldeli wagyzçysy» bäsleşiginde Türkmenistanyň Prezidentiniň alyp barýan hoşniýetli, parahatçylyk söýüjilikli içeri we daşary syýasatyny, amala aşyrýan özgertmelerini jemgyýetçilige wagyz-nesihat etmekde tapawutlanan Türkmenistanyň raýatlary ýeňiji hökmünde kesgitlenýärler.

"Ýaşyl meýdan, ýaşyl ýygyndy, ýaşyl Türkmenistan"

DrWaltBishop — Wed, 12 Dec 2018 05:29:01 +0000

Ýakynda Aziýanyň Futbol konfederasiýasynyň resmi saýtynda Aziýa kubogy - 2019-a gatnaşýan milli ýygyndylaryň şygaryny saýlamak boýunça ses berlişik geçirildi. Şygarlaryň nusgalaryny AFK-nyň hünärmenleriniň özleri saýlady. Şeýlelikde, janköýerler her milli ýygyndy üçin saýlanan dört-bäş şygaryň (motto-slogan) arasyndan iň mynasybyna öz seslerini berdiler.

Ses berlişigiň netijesinde Türkmenistanyň futbol boýunça milli ýygyndysy üçin "Ýaşyl meýdan, ýaşyl ýygyndy, ýaşyl Türkmenistan" şygary saýlanyp alyndy. Bu şygar ýaryşyň geçirilýän günlerinde biziň milli ýygyndymyzy gatnatjak awtobusa bezeg berer.

Topardaşlarymyzdan Ýaponiýanyň janköýerleri: "Her kime hormat goýup, hiç kimden çekinmän" diýen şygary saýlan bolsalar, özbek janköýerleri öz milli ýygyndysyna: "Biz şu ýerde. Özbegistan" diýen şygary mynasyp gördüler. Omanyň ýygyndysy üçin bolsa: "4 million ýürek, bir arzuw" diýen şygar saýlanyldy.

Aşakda AFK Aziýa 2019-a gatnaşýan ähli ýygyndylaryň şygarlaryny ýazaly:

TOPAR "A":
1. BAE: "Biziň wagtymyz geldi" (Our time is now).
2. Taýland: "Çansuek bilelikde bir jan" (Changsuek together as one) *Cansuek - söweş pili.
3. Hindistan: "Gök ýolbarslar: milletiň umydy" (Blue Tigers: The of a nation).
4. Bahreýn: "Hiç haçan 'Hiç haçan' diýme" (Never say never).

TOPAR "B":
1. Awstraliýa: "Gahrymanlar beýgeler" (Heroes will rise).
2. Siriýa: "Bir ýygyndy. Bir millet. Bir Siriýa" (One team. One nation. One Syria).
3. Palestina: "Biz ýeňeris. Biz Palestina" (We will triumph. We are Palestine).
4. Iordaniýa: "Iordaniýany buýsandyr" (Make Jordan Proud).

TOPAR "Ç":
1. Gündogar Koreýa: "Biz Gyzyllar!" (We are the Reds!).
2. Hytaý: "Şol bir arzuw üçin söweşýär" (Fighting for the same dream).
3. Gyrgyzystan: "Ak Laçynlar!" (The White Falcons!).
4. Filippinler: "Mümkinsizligi hyýal etmek" (To dream the impossible).

TOPAR "D":
1. Eýran: "80 million adam. Bir millet. Bir ýürek urgusy" (80 Million People, One Nation, One Heartbeat).
2. Yrak: "Şirler hemişe agdyklyk eder" (Lions always prevail).
3. Wýetnam: "Altyn ýyldyz göreşijileri" (Golden Star Warriors).
4. Ýemen: "Hiç haçan boýun egme" (Never give up).

TOPAR "E":
1. Saud Arabystany: "Sähradan Aziýanyň tagtyna" (From the desert to the throne of the Continent).
2. Katar: "Biz - Buýsanç Milleti" (We & the Nation of Pride are Fine).
3. Liwan: "Kedrler* gelýär" (The Cedars are coming) (Kedr - Liwanyň nyşany bolan daragt).
4. Demirgazyk Koreýa: "Çhollimanyň* ruhy bilen" (In the spirit of Chollima) (Çhollima - koreý rowaýatyna görä, ganatly at).

TOPAR "F":
1. Ýaponiýa: "Hemmäni hormatla, hiç kimden gorkma" (Respect all, fear none).
2. Özbegistan: "Biz şu ýerde. Özbegistan" (Here we are Uzbekistan).
3. Oman: "4 million ýürek, bir arzuw" (4 million hearts, one dream).
4. Türkmenistan: "Ýaşyl meýdan, ýaşyl ýygyndy, ýaşyl Türkmenistan" (Green ground, Green team, Green Turkmenistan).

ÇEŞME: Türkmen Portal we Fox Sports Asia

Çarwadarlaryň oýunlarynda ýigrimi üçünji medal

gyzgyn — Sun, 09 Sep 2018 08:28:26 +0000

Oýunlarda bäş gününiň dowamynda ýurdumyzyň ýygyndy toparynyň 23-nji medaly boldy.
Çarwadarlaryň III Bütindünýä oýunlarynda aba göreşi boýunça ýaryşlar geçirildi, onda türkmen türgenleri nobatdaky kümüş medala mynasyp boldular. Bu gezek 80 kilograma çenli agram derejede çykyş eden ildeşimiz Işanmyrat Ataýew tapawutlandy.

Sportuň bu görnüşi boýunça bäsleşiklere 18 ýurtdan kyrkdan gowrak türgen gatnaşdy. Biziň türgenimiz bäsdeşlerinden yzly-yzyna üstün çykyp, finala ýetdi. Emma finalda türkmenistanly türgene ýeňmek başartmady. Şunda biziň ildeşimiziň has ýokary orny eýelemäge mümkinçiligi hem bardy, ýöne öňki geçirilen tutluşyklarda birnäçe şikes alan hem-de belli bäsdeşleri bilen duşuşyklarda köp güýç sarp eden I.Ataýew diňe kümüş medal bilen kanagatlanmaly boldy.

Bu oýunlaryň bäş gününiň dowamynda ýurdumyzyň ýygyndy toparynyň 23-nji medaly boldy.

Häzirki güne çenli umumy hasapda Türkmenistanyň topary 8 altyn, 5 kümüş we 10 bürünç medal bilen dördünji orunda barýar.

Çarwadarlaryň III Bütindünýä oýunlarynda pälwanlarymyzdan "şow"

gyzgyn — Sun, 09 Sep 2018 08:00:27 +0000

Gyrgyz Respublikasynda açylan Çarwadarlaryň III Bütindünýä oýunlarynda türkmen pälwanlary "şow"yna dowam edýär.

Çarwadarlaryň III Bütindünýä oýunlarynyň üçünji gününde Türkmenistanyň ýygyndy toparynyň gazananlarynyň üsti medallaryň ýene-de bäşisi bilen ýetirildi. Olaryň hatarynda üç altyn, bir kümüş we iki bürünç medallar bar. Ýaryşa gatnaşýan halklaryň milli göreşiniň görnüşlerinde üstünlikli çykyş etmek biziň türgenlerimiz üçin oňat däbe öwrüldi.

Ýygyndymyzyň türgenleri türkmen göreşinde uly üstünlige eýe boldular. Göreşiň bu görnüşinde altyn medallaryň üçüsi gazanyldy. 60 kilograma çenli agramlyk derejede Nowruz Eýeberdiýew, 70 kilograma çenli agramlyk derejede Rejepgeldi Gylyçnyýazow hem-de 80 kilograma çenli agramlyk derejede Arslan Ybraýymgulyýew hormat münberiniň iň ýokarky basgançagyna çykmagy başardylar.

Pählawany eýran göreşinde Rahat Bäşimow (80 kilograma çenli agramlyk derejede) kümüş medala mynasyp boldy.

Muhammet Gurbanow 70 kilograma çenli agramlyk derejede gazak milli göreşinde bürünç baýragy eýeledi. Munuň özi hem ýygyndymyzyň türgeniniň netijeli çykyşy hasaplanylýar.

Çarwadarlaryň Bütindünýä oýunlarynyň üç gününiň netijelerini jemläp, Türkmenistanyň ýygyndysynyň jemi 18 medal, şol sanda 8 altyn, 3 kümüş, 6 bürünç medal gazanandygyny bellemelidiris.

Umumy medal hasabynda biziň ýygyndymyz 4-nji orny eýeleýär.

Gurbansoltan eje etraby agyr atletika sport mekdebi pälwanlary taýýarlaýan merkez hasaplanýar

nazaroff — Mon, 28 May 2018 00:35:19 +0000

Daşoguz welaýatynyň Nurmuhammet Andalyp adyndaky geňeşliginde ýerleşýän sport mekdebi tanymallyga ýeten agyr atletikaçylaryň ençemesini taýýarlady. Golaýda onuň okuwçylarynyň biri, ýaş ştangaçy Reýimbergen Jumaýew halkara ýaryşynda şowly çykyş edip, milli ýygyndy topara dalaşgär boldy.
Mekdebiň beýleki bir okuwçysy Şerzat Rustambaýew ýaşlaryň arasynda Ürgençde geçirilen Aziýa çempionatynda 77 kilograma çenli agramda bürünç medala mynasyp boldy. Dürli ýyllarda milli ýygyndy toparyň hatarynda çykyş eden agyr atletikaçylaryň ençemesi şu sport mekdebinde ussatlygyň ilkinji tilsimlerini öwrenipdiler. Olaryň arasynda Olimpiýa oýunlarynyň dördüsine gatnaşan halkara derejeli sport ussady Ümürbek Bazarbaýew, Olimpiýa oýunlarynyň ikisine gatnaşan Tolkunbek Hudaýbergenow, London Olimpiadasyna gatnaşan Mansur Rejebow, halkara ýaryşynyň bürünç baýragynyň eýesi Maksut Rejebow dagy bar.
77 kg çenli agramda V Aziadanyň ýeňijisi we 2017-nji ýylda agyr atletika boýunça ABŞ-da geçirilen dünýä çempionatynda kümüş medallaryň üçüsini eýelän Rejepbaý Rejebowam sportda ilkinji ädimlerini hut şu mekdepde edipdi.
Üstünlikli okuw-terbiýeçilik işiniň esasy sertleri-- maddy-tehniki üpjünçilik we halypalaryň netjeli usullarydyr, olaryň arasynda Rozumbaý Rejebow, Sanjar Kadyrbergenow, Hudaýbergen Rejebow ýaly ussat tälimçiler bar. Olaryň sport ussatlaryny ýetişdirmek, şägirtlerinde zähmetsöýerligi we türgenleşikleriň ähmiýetine düşünmegi terbiýlemek, olary şahsy ösüşlere höweslendirmek zehini netijesinde mekdebe gatnamaga höwesek çagalaryň sany barha artýar. Häzirki wagtda bu ýerde dürli ýaşdaky we agramdaky okuwçylaryň iki ýüz elliden gowragy tejribeli tälimçileriň ýolbaşçyllygynda rekordlar goýmaga erjel taýýarlanýarlar.

ÇEŞME: TRT HABAR

Mary welaýatynyň Wekilbazar etraby Ýurduň iň gowy etraby saýlandy $1 million sylag berildi

nazaroff — Sat, 27 Jan 2018 13:49:36 +0000

Türkmenistanda 2017-nji ýylyň başynda, ýyllyk sosial-ykdysady we medeni görkezijileri esasynda, ýurduň etrap-şäherleriniň arasynda bäsleşik yglan edildi.
Bäsleşikde Mary welaýatynyň Wekilbazar etraby ýeňiji boldy.
Gurbanguly Berdimuhamedow Mary welaýatynyň Wekilbazar etrabyny 1 million ABŞ dollary möçberindäki pul baýragy bilen sylaglamak hakyndaky karara gol çekdi diýip, TDH döwlet habar gullugy habar berýär.
Şeýle-de prezident 2018-nji ýylyň bäsleşigini yglan etmek baradaky karara gol çekdi.

ÇEŞME: Türkmenistanyň Hronikasy