Gyzgyn - "arslanmyrat amanow" teg entryler

Arslanmyrat Amanow Özbegistanyň çempiýonyna goşuldy

DrWaltBishop — Tue, 05 Feb 2019 05:19:05 +0000

Türkmenistanyň futbol boýunça milli ýygyndysynyň kapitany, 28-nji martda 29 ýaşyny doldurjak ýarym goragçy Arslanmyrat Amanow şu gün resmi ýagdaýda Özbegsitanyň «Lokomotiw» futbol toparynyň düzmine goşuldy. Bu barada şu gün toparyň resmi saýtynda (www.lokomotiv.uz) hem habar berildi. Saýtdaky habaryň suratynda Arslanmyrat Amanowyň Türkmenistanyň milli ýygyndysynyň lybasyndaky suratyna «Welcome, Arslan!» (Hoş geldiň, Arslan!) diýen ýazgy ýerleşdirilipdir. Surat üçin salgy: https://i.hizliresim.com/LllOdj.jpg

Daşary ýurtlardaky 5-nji, Özbegistandaky 3-nji topar:
Türkmenistanyň futbol çempionatynda «Aşgabat», HTTU, «Altyn asyr» ýaly toparlarda futbol oýnan tejribeli ýarym goragçy Merkezi Aziýada hem giňden tanalýar. Munuň esasy sebäpleriniň biri bolsa onuň Gazagystanyň we Özbegistanyň çempionatlarynyň öňdebaryjy toparlarynda çykyş edendigidir. 2012-nji ýylda Gazagystanyň «Okžetpes» toparynda futbol oýnan ildeşimiz 11 duşuşykda 866 minut meýdanda galdy. Arslanmyrat Amanow bu duşuşyklarda bir gezek tapawutlanmagy başardy.
Türkmenistanly ýarym goragçy 2014-nji ýylda Gazagystanyň başga bir güýçli topary «Yrtyşyň» düzümine goşuldy. Bu ýerde 24 oýun geçiren ildeşimiz jemi 1393 minut ýaşyl meýdanda başarnygyny görkezdi. Bu topar bilen hem ol bir gezek tapawutlanmagy başardy.
Özbegistana ilkinji ädimini ozalky «Almalykda» , häzirki AGMK-da äden futbolçy 2015 ― 2016-njy ýyllaryň möwsümlerini bu ýerde geçirdi. 54 oýna gatnaşan (2392 minut) ildeşimiz olarda 8 gezek tapawutlandy. Arslanmyrat geçen möwsümi ýene-de Özbegistanyň «Buhoro» futbol toparynda geçirdi we 29 duşuşykda 5 gezek tapawutlandy.

Täsin ukyp täze gapylary açdy:
Türkmenistanyň milli ýygyndysynyň Aziýa kubogy ― 2019-daky ilkinji duşuşygynda Ýaponiýanyň derwezesine ilkinji we juda owadan pökgini geçiren Arslanmyrat Amanow geçen möwsümiň ahyrynda «Buhorodan» aýryldy. Aziýa kubogynyň finalyna çykan ýygyndynyň derwezesine şu ýaryşda ilkinji, belki-de iň owadan pökgini geçiren futbolçy hökmünde taryha giren Arslanmyrat Amanowa bada-bat birnäçe topar isleg bildirdi. Oýunçynyň özi bu barada ýaryş dowam edýärkä, Özbegistanyň «Chempionat.asia» saýtyna beren interwýusynda hem aýtdy. Şonda ol özi bilen Özbegistandan hem birnäçe toparyň işleşmek isleýändigini aýdypdy. Şu gün, günüň birinji ýarymynda ýene-de «Chempionat.asia» saýty Arslanmyrat Amanowyň öz karýerasyny Özbegistanda dowam etdirip biljekdigi barada habary ýerleşdirdi. Ýöne habarda hiç bir topar barada anyk maglumat berilmedi. Şu habardan birnäçe sagat, belki-de birnäçe minut soňra «Lokomotiw» resmi saýtynda türkmenistanly ýarym goragçynyň topara goşulandygyny habar berdi.

Amanowyň täze topary barada maglumatlar:
Adyndan hem belli bolşy ýaly, «Lokomotiw» Özbegistan demir ýollary paýdarlar jemgyýetine degişli. 2002-nji ýylda döredilen topar duşuşyklaryny Daşkent şäherindäki «Lokomotiw» stadionynda (8 müň orunlyk) geçirýär. Toparyň baş tälimçisi Andreý Fýodorow.
2002-nji ýylda Özbegistanyň futbol çempionatynyň ikinji ligasynda çykyş edip başlan «Lokomotiw» bir ýyldan soňra birinji liga, 2004-nji ýylda bolsa Ýokary liga ― Oliý liga çykdy. Ýöne 2011-nji ýylda ýene bir gezek birinji liga düşen topar şol möwsümde çempion bolup, bir ýyl soňra ýene Ýokary liga dolandy. Ýurduň çempionatynyň soňky üç möwsümi «demirýolçylaryň» çempionlygy bilen tamamlandy. Topar Ýokary liganyň çempionlygyny 3, kümüş medalyny 3, bürünç medalyny bir gezek gazandy. Birinji ligada bolsa bir gezek çempion bolup, bir gezek hem kümüş medal eýeledi. Ýurduň Kubogyna 3 gezek mynasyp bolan topar, bir gezek Naýbaşy kubogy eýeledi.

2013-nji ýyldan bäri yzygiderli Aziýanyň Çempionlar lligasynda çykyş edip gelýän «Lokomotiw» 2016-njy ýylda çärýek finala çenli baryp ýetdi. Geçen ýyl bolsa topar ýaryşýan toparçasynda üçünji orny eýeledi. Geçen ýylky çempionlyk Lokomotiwe Aziýanyň Çempionlar ligasynda ýene-de toparçalara goşulmaga mümkinçilik berdi. Diýmek, Arslanmyrat Amanow bu möwsümde yklymyň birinji derejeli ýaryşynda futbol oýnap, dünýä ýyldyzlary bilen bäsleşmäge mümkinçilik alar.

ÇEŞME: Türkmen portal

AFK-nyň resmi saýtynda Arslamyrat Amanow bilen söhbetdeşlik

gyzgyn — Sun, 13 Jan 2019 04:16:40 +0000

Aziýanyň Futbol konfederasiýasynyň resmi saýtynda (www.the-afc.com) Türkmenistanyň milli ýygyndysynyň kapitany, ýarym goragçy Arslanmyrat Amanow bilen söhbetdeşlik berildi. Söhbetdeşlik: «Çarşenbe gününde Ýaponiýanyň ýygyndysyndan 2:3 hasabyndaky utuşa garamazdan, türkmenistanly ýarym goraçy Arslamyrat Amanow «F» toparçada Özbegistan bilen geçiriljek duşuşygyň öňüsyrasynda maksada okgunly, ruhubelent görünýär» diýen sözlem bilen başlanýar.

Aziýanyň dört gezek çempiony bilen bolan duşuşygyň özleri üçin ýeňil bolmadyk synaga öwrülendigini aýdan ýarym goragçynyň duşuşygyň birinji ýarymynda uzak aralykdan ýyldyrym tizliginde geçiren pökgüsi Türkmenistanyň milli ýygyndysynyň bu duşuşykda ilkinji bolup hasaby açmagyna getirdi.

― Ýeňlendigimize garamazdan, öňümizde ýene iki oýun bar, diýmek, indiki tapgyra çykmak mümkinçiligimiz hem bar. Tälimçimiziň görkezmelerini berk berjaý edip, Özbegistan bilen boljak duşuşykda juda hüşgär oýnamaly.

Elbetde, Ýaponiýa güýçli ýygyndy. Oýnuň ýeňil düşmejekdigini öňden hem bilýärdik. Muňa garamazdan, oglanlarymyzyň elinden gelen yhlasy gaýgyrmandygyny her kim hem görendir. Ýöne bu ― yklym çempionaty. Ýeňil duşuşyk ýok. Özbegistana garşy duşuşyk hem juda jogapkärli. Elbetde, biz ýeňiş gazanmak isleýäris.

Duşuşyk ― şu çempionatdaky ilkinji, belki-de ýeke-täk Merkezi Aziýa derbisi. Özümizi we janköýerlerimizi kanagatlandyrjak netije almak üçin elimizden gelenini gaýgyrmarys. Ýaponiýanyň ýygyndysyna garşy orta goýan sazlaşykly oýnumyz we yhlasymyz bize bu duşuşykda hem ýar bolar diýip umyt edýäris ― diýip, tejribeli ýarym goragçy saýtyň habarçysynyň sowallaryna jogap berdi.

Arslanmyrat Amanow duşuşykda hemmeleri haýran eden urgusy baradaky sowala şeýle jogap berdi:

― Beýle urgularyň birnäçesini ozal hem ençeme ýola dürs başarypdym. Ýene başarjakdygyma ynanýardym. Bu duşuşykda bolsa, pökgi şol ýere getirenimde öňümde hiç hili päsgelçiligiň ýokdugyny gördüm we bagtymy synadym. Görşüňiz ýaly, netijesini hem berdi.

ÇEŞME: Türkmen Portal

Arslanmyrat Amanowyň urgusynyň tizligi sagatda 113 km

gyzgyn — Thu, 10 Jan 2019 05:50:32 +0000

Türkmenistanyň we Ýaponiýanyň milli ýygyndylarynyň arasynda 9-njy ýanwarda Aziýa kubogynyň çäginde geçirilen duşuşygyň ilkinji pökgüsini 26-njy minutda ýarym goragçymyz we kapitanymyz Arslanmyrat Amanow geçirdi. Başga bir tejribeli ýarym goragçy, häzirki wagtda futbol ýoluny Çehiýada dowam etdirýän Ruslan Mingazowyň özüne geçiren pökgüsini derwezeden ep-esli aralyk uzakdan dürs urgy bilen gönükdiren A.Amanowyň bu urgusy futbol hünärmenleriniň, şol sanda Aziýanyň Futbol konfederasiýasynyň wekilleriniň ünsüni özüne çekdi.

Çempionatda häzire çenli geçirilen pökgüleriň arasynda iň owadanlarynyň biri bolan urgy başha bir aýratynlygy bilen hem haýran galdyrýar. Ýörite tehnologiýalaryň hasaplaryna görä, türkmenistanly ýarym goragçynyň bu urgusynyň tizligi sagatda 113 kilometre barabar boldy. Jemi 5 pökgi geçirilen duşuşykda Aziýanyň iň güýçli ýygyndylarynyň birinden ýeňlendigine garamazdan, ýiti oýny bilen daşary ýurt metbugatynyň ünsüne düşen milli ýygyndymyz kapitanyň bu täsin urgusy bilen özüne bolan gyzyklanmalary has artdyrdy.

Türkmen futbolçylary Aziýa kubogy ― 2019-daki ikinji duşuşygyny 13-nji ýanwarda Özbegistanyň ýygyndysy bilen geçirer.

Arslanmyrat Amanowyň golyny şu salgydan görüp bilersiňiz: https://www.youtube.com/watch?v=SAwC_p5r1DQ