Gyzgyn - "afk 2019" teg entryler

AFK kubogy 2019. Alaýy ýeňen Ahal pleý-offa çykdy

gyzgyn — Wed, 27 Feb 2019 05:28:55 +0000

Futboluň müňlerçe janköýeri geçen çarşenbe güni paýtagtymyz bilen adybir köpugurly stadionda ajaýyp futbol duşuşygyna tomaşa etdi. Indi üçünji gezek yklym ýaryşyna ― AFK-nyň kubogyna saýlama tapgyrdan gatnaşýan «Türkmennebitönümleri» baş müdirliginiň «Ahal» futbol topary ýene-de bir şowly ädimi ätdi. Gyrgyz Respublikasynyň wise-çempiony «Alaý» toparyndan 1:0 (iki duşuşygyň jemi boýunça 3:1) hasabynda üstün çykan türkmen futbolçylary ýaryşy pleý-off tapgyrynda, başgaça aýtsak, saýlama tapgyryň indiki ädiminde dowam etdirerler.
«Türkmenistan ― rowaçlygyň Watany» ýylynda ýurdumyzda geçirilen ilkinji halkara duşuşyga tomaşa etmek üçin köpugurly sport toplumynyň döwrebap stadionyna paýtagtymyzyň ýaşaýjylarynyň we myhmanlarynyň 10 ýarym müňüsi ýygnandy. Şunça ýürek «Ahaly» goldady. «Ahal» hem öz gezeginde janköýerleriň belent ynamyny ödäp, ýaryşyň indiki tapgyryna çykmagy başardy.
Iki duşuşygyň ykbaly hem 35 minutda kesgitlenildi
Aşgabatdaky duşuşygyň 35-nji minudynda «Ahalyň» tejribeli ýarym goragçysy Merdan Gurbanow hasaby açdy. Şol geçirilen pökgi hem tutuş duşuşygyň ykbalyny kesgitledi. Biziň esasy nygtajak bolýan zadymyz, iki duşuşyga hem mahsus bir täsin ýagdaýdyr. Ýadyňyzda bolsa, Gyrgyz Respublikasynyň Oş şäherinde geçirilen ilkinji duşuşykda hem ýeňiji ilkinji 35 minutda geçirilen üç pökgi bilen kesgitlenipdi. Birinji ýarymyň esasy wagtynyň tamamlanmagyna 10 minut galýança, «Ahal» iki, ýer eýeleri bir pökgi geçirip ýetişipdiler. Şondan soňky hüjümleriň biri hem netije bermedi.
Şeýle ýagdaý şu gezek hem gaýtalandy. Hususan-da, ikinji ýarymda biziň futbolçylarymyzdan Pirmyrat Sultanowa, Azady Annadurdyýewe, Guwanç Abylowa, myhmanlaryň hüjümçisi Joel Koja tapawutlanmaga, hasaby açmagy birnäçe mümkinçilik döredi. Derwezewandan geçip, derwezä girmän gaýdan pökgüler hem boldy. Hasap welin açylmady. Şeýlelikde, «Ahal» iki duşuşykda hem işi ilkinji 35 minutda çözdi.
20 duşuşykda 31 pökgi
Çarşenbe güni «Ahal» AFK-nyň kubogyndaky ýubileý ― 20-nji duşuşygyny geçirdi. Olaryň 8-si 2015-nji, 10-sy 2018-nji, galan 2-si bolsa şu ýyla degişlidir. Geçirilen duşuşyklarda garşydaş derwezelere 31 pökgi geçiren «Ahalyň» futbolçylary milli çempionatdaky esasy bäsdeşi «Altyn asyrdan» soňra ikinji orny eýeleýär. Yklym ýaryşyna ýene-de toparçalaýyn tapgyrdan başlamaga hukuk gazanan «Altyn asyryň» futbolçylary 24 duşuşykda 42 gezek tapawutlanypdylar.
Umumylykda, çarşenbe güni biziň futbol toparlarymyzyň AFK-nyň kubogyndaky 83-nji duşuşygyna şaýat bolduk. Türkmen futbolçylary yklym ýaryşyndaky 28-nji ýeňşini gazandylar we 114-nji pökgüsini geçirdiler. Gyrgyz toparlary AFK-nyň kubogynda biziň futbolçylarymyz bilen iň kän garşylaşan toparlardyr. Çarşenbe günündäki duşuşyk Gyrgyz Respublikasynyň toparlary bilen 15-nji duşuşygymyz boldy. Olaryň 8-si «Alaý», galan 7-si «Dordoý» bilen geçirilen duşuşyklardyr.
Şol gün AFK-nyň kubogy ugrundaky ýaryşlarda ilkinji pökgüsini geçiren, howply hüjümleriň başga-da birnäçesini geçirmäge gatnaşyp, duşuşygyň iň gowy oýunçysy bolan Merdan Gurbanow yklym ýaryşynda tapawutlanan 39-njy türkmenistanly futbolçy boldy. Bu ýaryşda iň köp tapawutlanan futbolçylaryň sanawynyň başyny bolsa «Altyn asyrdan» Altymyrat Annadurdyýew çekýär. Şu ýyl ýene-de «Altyn asyryň» düzüminde yklym ýaryşyna gatnaşjak futbolçy yzda galan ýyllarda 15 pökgi geçirdi.
Indiki garşydaş ― «Hujand»
Şeýlelikde, «Ahal» ýaryşyň pleý-off tapgyryna çykdy. Ýeňijä toparçalardan orun berjek tapgyrda türkmen futbolçylarynyň garşydaşy Täjigistanyň wise-çempiony «Hujand» futbol topary. Geçen ýyl hem şeýle tertibiň gaýtalanandygy okyjylarymyzyň ýadyndadyr. Saýlama tapgyryň birinji ädiminde «Dordoýdan» üstün çykan futbolçylarymyz peý-offda «Hujand» bilen duşuşyp, bu tapgyrdan hem üstünlikli geçipdiler.
Pleý-offuň ilkinji duşuşygy 6-njy martda ýene-de Aşgabatda kesgitlener. Jogap duşuşygy bolsa 13-nji martda Täjigistanda bolar. «Ahal» bu tapgyrdan hem üstünlikli geçip bilse, bassyr ikinji ýyl yklym ýaryşynyň bir toparçasynda iki wekilimiz ýaryşar.
AFK-nyň kubogy. Saýlama tapgyr.
27-nji fewral. «Aşgabat» stadiony. 10500 tomaşaçy.
«Ahal» (Türkmenistan) ― «Alaý» ― 1:0.
Pökgi geçiren: Merdan Gurbanow, 35.
«Ahalyň» düzümi: Batyr Babaýew, Gurbanguly Aşyrow, Şöhrat Söýünow, Döwran Orazalyýew (Pirmyrat Sultanow 72), Guwanç Abylow, Didar Durdyýew (Yhlas Saparmämmedow, 66), Wezirgeldi Ylýasow (kapitan), Hoşgeldi Hojowow, Abdy Bäşimow, Mirza Beknazarow, Merdan Gurbanow (Azady Annadurdyýew, 80).
«Alaýyň» düzümi: Abduaziz Makhamow, Nursultan Atamurzaýew, Odiljon Abdurahmanow (kapitan), Amir Şarifi (Aldilarbek Kabylbekow, 85), Joel Kojo, Timur Talipow, Akramjon Umarow, Çingiz Subanow (Şohmurod Mansurow, 56), Dawlatjan Baratow, Eldiýar Sardarbekow (Ulugbek Riskulow, 52), Sanjar Şarşiýew.
Duşuşygyň iň gowy oýunçysy: Merdan Gurbanow («Ahal»).
Baş emin: Mohammed Hled Al-Hoiş (Saud Arabystany).

ÇEŞME: Türkmen Portal

Aziýa Futbol Kubogy 2019-yň eýesi Katar boldy

gyzgyn — Sat, 02 Feb 2019 07:20:04 +0000

24-25 Ýanwar 2019-da Aziýa kubogy 2019-yň 1/4 final tapgyry:
Wýetnam 0 - 1 Ýaponiýa [GOL: Ýaponiýa: Ritsu Doan (57 min.)]
Hytaý 0 - 3 Eýran [GOL: Eýran: Mehdi Taremi (18 min.), Sardar Azmoun (31 min.), Karim Ansarifard (90+1 min.)]
Gündogar Koreýa 0 - 1 Katar [GOL: Katar: Abdulaziz Hatem (78 min.)]
BAE 1 - 0 Awstraliýa [GOL: BAE: Ali Mabkhout (68 min.)]

28 Ýanwar 2019-da Aziýa kubogy 2019-yň 1/2 Semi-final Tapgyry:
Eýran 0 - 3 Ýaponiýa [GOL: Ýaponiýa: Yuya Osako (56 min.), Yuya Osako (67 min.), Genki Haraguchi (90+1 min.)]

29 Ýanwar 2019-da Aziýa kubogy 2019-yň 1/2 Semi-final Tapgyry:
Katar 4 - 0 BAE [GOL: Katar: Boualem Khoukhi (22 min.), Almoez Ali (37 min.), Hassan Al Haydos (80 min.), Hamid Ismail (90+3 min.)]

1 Fewral 2019-da Aziýa kubogy 2019-yň Final Tapgyry:
Ýaponiýa 1 - 3 Katar [GOL: Katar: Almoez Ali (12 min.), Abdulaziz Hatem (27 min.), Akram Afif (83 min.) ― Ýaponiýa: Takumi Minamino (69 min.)]

AFK 2019 çempiýonatynyň 1/8 tapgyrynda alynan netijeler

gyzgyn — Tue, 22 Jan 2019 07:32:20 +0000

20-22 Ýanwar 2019-da Aziýa kubogy 2019-yň 1/8 final tapgyry:

Iordaniýa 1 - 1 Wýetnam [GOL: Iordaniýa: Baha Abdel Rahman (39 min.) ― Wýetnam: Nguýen Cong Phuong (51 min.)]
Iordaniýanyň we Wýetnamyň ýygyndylary Dubaý şäherindäki Al-Maktum stadiýonynda 14205 tomaşaçynyň öňünde duşuşdylar. Esasy wagty 1:1 hasabyndaky deňlik bilen tamamlanan duşuşykda ýeňijini kesgitlemäge ýarym sagatlyk goşmaça wagt hem ýeterlik bolmady. Şeýlelikde, duşuşygyň ykbaly 11 metrlik jerime urgularyna galdy. Jerime urgularynda Iordaniýa adyna Faisal we Samir, Wýetnam adyna bolsa Tran Minh Wuong dürs ýerine ýetirip bilmediler we 2:4 hasabynda ýeňiş Wýetnam, garaşylmadyk ýagdaýda, ýaryşyň çärýek finalyna çykdy.

Taýland 1 - 2 Hytaý [GOL: Taýland: Supaçai (31 min.) ― Hytaý: Hiao Ži (67 min.), Gao Lin (71 min.)]
Taýland we Hytaý Al-Aýn şäherindäki Hazza Bin Zayed stadiýonynda 8026 tomaşaçynyň öňünde duşuşdylar. Bu duşuşyk toparçalaýyn tapgyrdaky Türkmenistan ― Ýaponiýa duşuşygyna çalym etdi diýsek ýalňyşmarys. Birinji ýarymy öňde tamamlan tailandly futbolçylar derwezesine ikinji ýarymda geçiren iki pökgi bilen ýeňildiler. Has takygy, 31-nji minutda Supaçainiň Hytaýyň milli ýygyndysynyň derwezesine geçiren pökgüsi bilen tailandly futbolçylar çärýek finala bir ädim ýakynlaşdylar. Ýöne bu üstünlik 67-nji minuda çenli saklandy. Şol minutda hytaýly futbolçylar Hiao Žiniň goly bilen hasaby deňlediler. Şondan 4 minut soňra ýerli emin Mohammed Abdulla hasan Mohamed Taýlandyň derwezesine 11 metrlik jerime urgusyny belledi. Urgyny dürs ýerine ýetiren Gao Lin Hytaýyň milli ýygyndysyna arzyly ýeňşi getirdi.

Eýran 2 - 0 Oman [GOL: Eýran: Alireza Jahanbahş (32 min.), Aşkan Dejagah (41 min.)]
Eýran we Oman Abu-Dabi şäheriniň Mohammed bin Zaýed stadionyna 32 müňe ýakyn (31945) janköýer ýygnandy. Bu duşuşyk iň köp janköýerleriň ýygnan duşuşyklardan biri boldy. Her ýarymynda bir pökgi geçirilen duşuşygyň birinji ýarymynda Jahanbahş (32 minut) tapawutlandy. 41-nji minutda Dejagahyň dürs ýerine ýetiren 11 metrlik jerime urgusy duşuşygyň netijesini hem kesgitledi.

Ýaponiýa 1 - 0 Saud Arabystan [GOL: Ýaponiýa: Takehiro Tomiýasu (20 min.)]
Şarja şäheriniň adybir stadionynda 7 müňe golaý (6832) tomaşaçynyň gatnaşmagynda geçirilen duşuşykda Ýaponiýanyň hem-de Saud Arabystanynyň ýygyndylary çärýek finala çykmak üçin göreşdiler. Duşuşykda toparçalaýyn tapgyrdaky garşydaşymyz ― ýapon futbolçylary ýeke-täk pökgi bilen üstün çykyp, ýaryşy dowam etdirmäge hukuk gazandylar. Ýeňiş pökgüsini duşuşygyň 20-nji minudynda Takehiro Tomiasu geçirdi. Şeýlelikde, ýaryşda galan ýeke-täk topardaşymyz çärýek finalda Wýetnamyň ýygyndysy bilen duşuşar.

Awustraliýa 0 - 0 Özbegistan [JERIME URGYLARY bilen 4-2 Awustraliýa ýeňiji boldy]
Al-Aýn şäherindäki Halifa bin Zaýed stadionynda Awstraliýanyň we Özbegistanyň milli ýygyndylary Aziýa kubogy 2019-yň 1/8 final tapgyrynda 6809 tomaşaçynyň öňünde duşuşdylar. Esasy wagty hem, goşmaça ýarym sagatlyk wagt hem 0:0 hasabyndaky deňlik bilen tamamlanan duşuşygyň netijesi 11 metrlik jerime urgulary esasynda kesgitlenildi. Jemleýji urgularda ýaryşyň «F» toparçasynda milli ýygyndymyz bilen ýaryşan özbek futbolçylary iki urgyny dürs geçirip bilmän (Şukurow we Bikmaýew), duşuşykda ýeňildiler we Aziýa kubogy 2019-daky duşuşyklaryny tamamladylar. Geçen çempion Awstraliýanyň ýyygndysy bolsa jerime urgularynyň birinden (Beýiç) galanyny dürs ýerine ýetirdi. Şeýlelikde, Aziýa kubogynda Türkmenistanyň milli ýygyndysynyň çykyş eden «F» toparçasyndan indi diňe Ýaponiýanyň ýygyndysy ýaryşy dowam etdirýär. Çärýek finalda Awstraliýa ýer eýeleri ― BAE-niň milli ýygyndysy bilen duşuşar.

BAE 3 - 2 Gyrgyzystan [GOL: BAE: Khamis Esmaeel (14 min.), Ali Mabkhout (64 min.), Ahmed Khalil (103 min.) ― Gyrgyzystan: Mirlan Murzaew (26 min.), Tursunali Rustamow (90+1 min.)]
BAE-niň we Gyrgyz Respublikasynyň milli ýygyndylary 1/8 final duşuşygyny Abu-Dabi şäherindäki Zaýed Sports City stadiýonynda 17784 tomaşaçynyň öňünde geçirdiler. Ýer eýelerinden Hamis Esmailiň duşuşygyň 14-nji minudynda geçiren pökgüsine gyrgyz futbolçylary 26-njy minutda Mirlan Murzaýewiň goly bilen jogap berdiler. Birinji ýarymy 1:1 hasabyndaky deňlik bilen tamamlanan duşuşygyň ikinji ýarymynda hasaby ýene-de ýer eýeleri ― BAE-niň futbolçylary artdyrdy. Bu gezek 64-nji minutda Ali Mabhut tapawutlandy. Hemmeleriň BAE-niň milli ýygyndysynyň 2:1 hasabyndaky ýeňşine garaşýan pursatlarynda, yklym ýaryşyna ilkinji gezek gatnaşýandygyna garamazdan, gyrgyz futbolçylary aňsat-aňsat oýny elden bermejekdigini ýene bir ýola görkezdiler. Goşmaça wagtyň ilkinji minudynda Tursunali Rustamow gyrgyz ýygyndysynyň peýdasyna hasaby deňledi. Şeýlelikde, duşuşygyň ykbaly ýarym sagatlyk goşmaça wagta galdy. Goşmaça wagtyň birinji ýarymynyň tamamlanmagyna 2 minut galanda eminiň bellän 11 metrlik jerime urgusyny dürs ýerine ýetiren Ahmed Halil duşuşykda jemleýji sözi sözledi. Milli ýygyndylaryň duşuşygyň galan dowamyndaky hüjümleriniň hiç biri hem netije bermedi, şeýlelikde 3:2 hasabynda ýeňiş gazanan ýer eýeleri ― BAE-niň milli ýygyndysy ýaryşyň çärýek finalyna çykdy.

Gündogar Koreýa 2 - 1 Bahreýn [GOL: G.Koreýa: Hwang Hee-chan (43 min.), Kim Jin-su (105+2 min.) ― Bahreýn: Mohamed Al Romaihi (77 min.)]
Dubaý şäheriniň Rashid stadiýonynda Gündogar Koreýa we Bahreýn duşuşdylar. Duşuşygyň 43-nji minudynda Gündogar Koreýa adyna Hwang Hee-chan Bahreýn derwezesine gol geçirdi we hasaby açdy. Duşuşygyň ikinji ýarymynyň 72-nji minudynda Bahreýn adyna Mohamed Al Romaihi hasaby deňledi we duşuşygyň esasy wagty 1-1 hasap bilen tamamlandy. Goçmaça oýnanan 15-minutlyk iki ýarym wagtynda bolsa, Gündogar Koreýanyň futbolçysy Kim Jin-su 107-nji minudynda Lee Yong-yň asisti bilen Bahreýn derwezesine pökgini geçirmegi başardy. Duşuşyk 2-1 hasap bilen Gündogar Koreýanyň üstünligi bilen tamamlandy.

Katar 1 - 0 Yrak [GOL: Katar: Bassam Al Rawi (62 min.)]
Abu-Dabi şäheriniň Al Nahyan stadiýonynda Katar we Yrak duşuşdylar. Duşuşygyň 62-nji minudynda Katar adyna Bassam Al Rawi Yrak derwezesine gol geçirdi we hasaby 1-0 getirdi. Duşuşygyň galan wagtynda gol sesi çykmansoň duşuşyk 1-0 hasap bilen Kataryň üstünligi bilen tamamlandy.

Şeýlelik bilen, Wýetnam, Hytaý, Eýran, Ýaponiýa, Awustraliýa, BAE, Gündogar Koreýa we Katar AFK 2019 çempiýonatynyň 1/4 tapgyrynda çykyş etmäne hak gazandy.

Mämmet Orazmuhammedow AFK 2019 iň gowy ikinji derwezewany

gyzgyn — Sun, 20 Jan 2019 04:29:36 +0000

«Championat.asia» saýtynyň berýän maglumatyna görä, Türkmenistanyň futbol boýunça milli ýygyndysynyň derwezewany Mämmet Orazmuhammedow Birleşen Arap Emirliklerinde geçirilýän Aziýa kubogynyň toparçalaýyn tapgyrynda derwezäni howply urgulardan iň kän halas eden derwezewanlaryň sanawynda ikinji orny eýeledi. Saýtda berilýän hasaplamalara görä, milli ýygyndymyzyň bu ýaryşda geçiren duşşuyklarynyň üçüsinde-de başdan-aýaga ýaşyl meýdanda bolan derwezewan jemi 14 sany howply urgyny gaýtarmagy başardy. Onuň netijesi, toparçalaýyn tapgyryň nusgawy 11-ligine girizilen Iordaniýanyň derwezeçisi Amir Şafiniňkiden diňe bir halas ediş aşakda.

Aziýa kubogy ― 2019-da howply urgulary iň kän gaýtaran derwezewanlar:

1. Amir Şafi (Iordaniýa) ― 15
2. Mämmet Orazmuhammedow (Türkmenistan) ― 14
3. Maýkl Falkesgaard (Filippinler) ― 14
4. Ignatiý Nesterow (Özbegistan) ― 12
5. Mehdi Halil (Liwan) ― 10
6. Faýz Al-Ruşeýdi (Oman) ― 9
7. Mettýu Raýan (Awstraliýa) ― 9
8. Kutman Kadirbekow (Gyrgyzystan) ― 8
9. Siwarak Tedsungnoen (Taýland) ― 8
10. Rami Hamada (Palestina) ― 8

Aziýa Futbol Kubogy 2019-da 1/8 finallaryna galan ýygyndylar

gyzgyn — Thu, 17 Jan 2019 09:09:07 +0000

17-nji Ýanwar 2019-da Aziýa Kubogy 2019 çempiýonatynyň ähli toparçalardaky duşuşyklaryň tamamlanmagy bilen çempiýonatynda ýoluna dowam edenler we çempiýonatdan dolananlar hem belli boldy.

TOPAR "A":
1. BAE (5 Oçko)
2. Taýland (4 Oçko)
3. Bahreýn (4 Oçko)
4. Hindistan (3 Oçko)

TOPAR "B":
1. Iordaniýa (7 Oçko)
2. Awstraliýa (6 Oçko)
3. Palestina (2 Oçko)
4. Siriýa (1 Oçko)

TOPAR "Ç":
1. Gündogar Koreýa (9 Oçko)
2. Hytaý (6 Oçko)
3. Gyrgyzystan (3 Oçko)
4. Filippinler(0 Oçko)

TOPAR "D":
1. Eýran (7 Oçko)
2. Yrak (7 Oçko)
3. Wýetnam (3 Oçko)
4. Ýemen (0 Oçko)

TOPAR "E":
1. Katar (9 Oçko)
2. Saud Arabystany (6 Oçko)
3. Liwan (3 Oçko)
4. Demirgazyk Koreýa (0 Oçko)

TOPAR "F":
1. Ýaponiýa (9 Oçko)
2. Özbegistan (6 Oçko)
3. Oman (3 Oçko)
4. Türkmenistan (0 Oçko)

AFK 2019-yň soňky 16-lyk turunyň 12 milli ýygyndysy 6 toparçalardaky 1-nji we 2-nji ýeri alan ýygyndylarda sazlandy. Galan 4 ýygyndy bolsa iň gowy 3-nji ýer alanlar arasyndan saýlandy. Şeýlelik bilen Bahreýn, Gyrgyzystan, Oman we Wýetnam milli ýygyndylary soňky 16-lyk turuna atlaryny ýazdyrdylar. Wýetnam we Liwan ýygyndylaryň oçko we gol sanawlary deň bolansoň, olaryň sary-gyzyl kart disiplin sanawyna seredildi. Wýetnamyň jemi 5 sary kart disiplin sanawy tutuldy. Liwanyň bolsa hem 6 sary kart disiplin sanawy hasaplandy. Şeýlelik bilen Wýetnam iň gowy 3-nji ýer alan ýygyndylaryň dördünjisi bolup AFK 2019-yň soňky 16-lyk turuna adyny ýazdyrdy.

IŇ GOWY 3-NJI ÝER ALAN ÝYGYNDYLAR:
1. Bahreýn (4 oçko, gol sanawy +2:-2)
2. Gyrgyzystan (3 oçko, gol sanawy +4:-4)
3. Oman (3 oçko, gol sanawy +4:-4)
4. Wýetnam (3 oçko, gol sanawy +4:-5)
5. Liwan (3 oçko, gol sanawy +4:-5)
6. Palestina (2 oçko, gol sanawy +3:-3)

AFK 2019-yň 1/8 finallarynyň duşuşyk tertibi hem belli boldy.
https://i.hizliresim.com/166LVA.jpg

20-nji ýanwar 2019:
Iordaniýa ― Wýetnam
Taýland ― Hytaý
Eýran ― Oman

21-nji ýanwar 2019:
Ýaponiýa ― Saud Arabystan
Awstraliýa ― Özbegistan
BAE ― Gyrgyzystan

22-nji ýanwar 2019:
Gündogar Koreýa ― Bahreýn
Katar ― Yrak

Aziýa Futbol Kubogy 2019: Türkmenistan 1 - Oman 3

gyzgyn — Thu, 17 Jan 2019 07:05:33 +0000

17-nji ýanwarda Aşgabat wagty bilen 18:30-da Abu-Dabi şäheriniň "Mohammed bin Zayed" stadionynda Türkmenistanyň milli ýygyndysy Aziýa 2019 Kubogynyň «F» toparçasyndaky soňky tapgyrynyň duşuşygyny Omanyň ýygyndy toparynyň garşysyna geçirdi. Duşuşykda Nawaf Şukrullanyň ýolbaşçylygyndaky bahreýnli eminler topary eminlik etdi. Duşuşyk 1-3 hasaby bilen Omanyň üstünligi bilen tamamlandy.

GOLLAR:
20-nji minutda: Ahmed Al Mahaijri (Oman)
41-nji minutda: Altymyrat Annadurdyyev (Türkmenistan)
84-nji minutda: Muhsen Al Ghassani (Oman) [Assist: Ahmed Al Mahaijri]
90+3-nji minutda: Mohammed Al-Musallami (Oman) [Assist: Salaah Al-Yahyaei]

Şeýlelik bilen «F» toparçasyndan Ýaponiýa we Özbegistan ýoluna dowam etdi.

TOPAR "F":
1. Ýaponiýa (9 Oçko)
2. Özbegistan (6 Oçko)
3. Oman (3 Oçko)*
4. Türkmenistan (0 Oçko)

Aziýa Futbol Kubogy 2019: Türkmenistan 0 - Özbegistan 4

gyzgyn — Sun, 13 Jan 2019 06:14:50 +0000

13-njy Ýanwar 2019-de Dubai şäherindäki «Rashid» stadionynda Aziýa Futbol Kubogy 2019-yň «F» toparçasynyň çägindäki Türkmenistan - Özbegistan duşuşygy bolup geçdi. Duşuşyk 4-0 hasaby bilen Özbegistanyň üstünligi bilen tamamlandy.

GOLLAR:
17-nji minutda: Jawokhir Sidikow (Özbegistan)
24-nji minutda: Eldor Shomurodow (Özbegistan) [Assist: Otabek Shukurow]
40-njy minutda: Jaloliddin Masharipow (Özbegistan)
42-nji minutda: Eldor Shomurodow (Özbegistan) [Assist: Jaloliddin Masharipow]

AFK-nyň resmi saýtynda Arslamyrat Amanow bilen söhbetdeşlik

gyzgyn — Sun, 13 Jan 2019 04:16:40 +0000

Aziýanyň Futbol konfederasiýasynyň resmi saýtynda (www.the-afc.com) Türkmenistanyň milli ýygyndysynyň kapitany, ýarym goragçy Arslanmyrat Amanow bilen söhbetdeşlik berildi. Söhbetdeşlik: «Çarşenbe gününde Ýaponiýanyň ýygyndysyndan 2:3 hasabyndaky utuşa garamazdan, türkmenistanly ýarym goraçy Arslamyrat Amanow «F» toparçada Özbegistan bilen geçiriljek duşuşygyň öňüsyrasynda maksada okgunly, ruhubelent görünýär» diýen sözlem bilen başlanýar.

Aziýanyň dört gezek çempiony bilen bolan duşuşygyň özleri üçin ýeňil bolmadyk synaga öwrülendigini aýdan ýarym goragçynyň duşuşygyň birinji ýarymynda uzak aralykdan ýyldyrym tizliginde geçiren pökgüsi Türkmenistanyň milli ýygyndysynyň bu duşuşykda ilkinji bolup hasaby açmagyna getirdi.

― Ýeňlendigimize garamazdan, öňümizde ýene iki oýun bar, diýmek, indiki tapgyra çykmak mümkinçiligimiz hem bar. Tälimçimiziň görkezmelerini berk berjaý edip, Özbegistan bilen boljak duşuşykda juda hüşgär oýnamaly.

Elbetde, Ýaponiýa güýçli ýygyndy. Oýnuň ýeňil düşmejekdigini öňden hem bilýärdik. Muňa garamazdan, oglanlarymyzyň elinden gelen yhlasy gaýgyrmandygyny her kim hem görendir. Ýöne bu ― yklym çempionaty. Ýeňil duşuşyk ýok. Özbegistana garşy duşuşyk hem juda jogapkärli. Elbetde, biz ýeňiş gazanmak isleýäris.

Duşuşyk ― şu çempionatdaky ilkinji, belki-de ýeke-täk Merkezi Aziýa derbisi. Özümizi we janköýerlerimizi kanagatlandyrjak netije almak üçin elimizden gelenini gaýgyrmarys. Ýaponiýanyň ýygyndysyna garşy orta goýan sazlaşykly oýnumyz we yhlasymyz bize bu duşuşykda hem ýar bolar diýip umyt edýäris ― diýip, tejribeli ýarym goragçy saýtyň habarçysynyň sowallaryna jogap berdi.

Arslanmyrat Amanow duşuşykda hemmeleri haýran eden urgusy baradaky sowala şeýle jogap berdi:

― Beýle urgularyň birnäçesini ozal hem ençeme ýola dürs başarypdym. Ýene başarjakdygyma ynanýardym. Bu duşuşykda bolsa, pökgi şol ýere getirenimde öňümde hiç hili päsgelçiligiň ýokdugyny gördüm we bagtymy synadym. Görşüňiz ýaly, netijesini hem berdi.

ÇEŞME: Türkmen Portal

Arslanmyrat Amanowyň urgusynyň tizligi sagatda 113 km

gyzgyn — Thu, 10 Jan 2019 05:50:32 +0000

Türkmenistanyň we Ýaponiýanyň milli ýygyndylarynyň arasynda 9-njy ýanwarda Aziýa kubogynyň çäginde geçirilen duşuşygyň ilkinji pökgüsini 26-njy minutda ýarym goragçymyz we kapitanymyz Arslanmyrat Amanow geçirdi. Başga bir tejribeli ýarym goragçy, häzirki wagtda futbol ýoluny Çehiýada dowam etdirýän Ruslan Mingazowyň özüne geçiren pökgüsini derwezeden ep-esli aralyk uzakdan dürs urgy bilen gönükdiren A.Amanowyň bu urgusy futbol hünärmenleriniň, şol sanda Aziýanyň Futbol konfederasiýasynyň wekilleriniň ünsüni özüne çekdi.

Çempionatda häzire çenli geçirilen pökgüleriň arasynda iň owadanlarynyň biri bolan urgy başha bir aýratynlygy bilen hem haýran galdyrýar. Ýörite tehnologiýalaryň hasaplaryna görä, türkmenistanly ýarym goragçynyň bu urgusynyň tizligi sagatda 113 kilometre barabar boldy. Jemi 5 pökgi geçirilen duşuşykda Aziýanyň iň güýçli ýygyndylarynyň birinden ýeňlendigine garamazdan, ýiti oýny bilen daşary ýurt metbugatynyň ünsüne düşen milli ýygyndymyz kapitanyň bu täsin urgusy bilen özüne bolan gyzyklanmalary has artdyrdy.

Türkmen futbolçylary Aziýa kubogy ― 2019-daki ikinji duşuşygyny 13-nji ýanwarda Özbegistanyň ýygyndysy bilen geçirer.

Arslanmyrat Amanowyň golyny şu salgydan görüp bilersiňiz: https://www.youtube.com/watch?v=SAwC_p5r1DQ

Aziýa Futbol Kubogy 2019: Türkmenistan 2 - Ýaponiýa 3

nazaroff — Thu, 10 Jan 2019 03:40:48 +0000

9-njy Ýanwar 2019-de Abu-Dabi şäherindäki «Al-Nahýan» stadionynda Aziýa Futbol Kubogy ― 2019-yň «F» toparçasynyň çägindäki Türkmenistan ― Ýaponiýa duşuşygy bolup geçdi. Duşuşygynyň birinji ýarymy 1-0 Türkmenistanyň üstünligi bilen tamamlandy.Türkmen futbolçylary Aziýanyň iň güýçli ýygyndylarynyň biri bilen taryhynda ilkinji gezek geçirýän duşuşygynda pökgini 26-njy minutda milli ýygyndymyzyň kapitany Arslanmyrat Amanow 30-35 meter uzaklygdan berk urgy bilen hasaby açmagy başardy. Ýaponiýanyň ýygyndysy bilen taryhda ilkinji gezek geçirýän duşuşygymyzda hasaby milli ýygyndymyzyň kapitany Arslanmyrat Amanow açdy. Ýarym goragçy Ruslan Mingazowyň özüne geçiren pökgüsini owadan urgy bilen derwezä dürs geçiren kapitan, şeýlelikde, AFK 2019-daky ilkinji golumyzyň hem awtory boldy.

Emma duşuşygyň ikinji ýarymynda terjibeli Ýaponiýa ýygyndysy duşuşygyň 56-njy minudynda Genki Haraguçinin asisti bilen Ýuýa Osako hasaby 1-1'e deňledi. Diňeje dört minut soňra duşuşygyň 60-njy minudynda Yuto Nagatomonyň asisti bilen Ýuýa Osako ýene bir gezek saýlanyp Ýaponiýany 2-1 öňe çykardy. Duşuşygyň 71-nji minudynda bolsa Takumi Minaminonyň asisti bilen Ritsu Doan Ýaponiýa adyna hasaby 3-1 getirdi. Şeýdip, Ýaponiýa 15 minutda 3 pökgi geçirmegi başardy. Duşuşygynyň 78-njy minutda Altymyrat Annadurdyyew Ýaponiýa derwezewany bilen ýekeme-ýeke galdy we derwezewanyň fauly etmegi bilen duşuşygyň emini 11 meterlik jerime urgusyna karar berdi. Jerime urgusyny dürüst ýerine getiren Ahmet Ataýew hasaby 2-3'e getirdi. Duşuşygynyň galan möhletinde hiç gol sesi çykmansoň Türkmenistan AFK 2019-daky birinji duşuşygy Ýaponiýa garşysynda 2-3 hasap bilen ýeňildi.

Duşuşyň Gol we Esasy Pursatlarynyň Wideosy: http://www.the-afc.com/asiancup/matches/2018/983231

AFK 2019-iň açylyşynda BAE we Bahreýn 1-1 deňeçere galdy

nazaroff — Sat, 05 Jan 2019 14:33:12 +0000

Dün 5-nji ýanwar 2019-da Aziýa Futbol Kubogy (AFK) 2019-yň açylyş dabarasy boldy. Açylyş BAE we Bahreýn arasynda Abu Dabiniň "Zayed Sports City" stadiýonynda oýnanan duşuşyk bilen edildi we toparlar 90 minudyň soňunda ýeňişip bilmän 1-1 deňeçere galdy. Duşuşygyň birinji ýarymynda hiç gol sesi çykmady. Ikinji ýarymda 78-nji minutda Bahreýn topary adyna Mohamed Al Rohaimi tapawutlanyp hasaby açdy we Bahreýn raýatlaryny şatlandyrdy. Ýöne olaryň şatlygy gysga boldy, duşuşygyň 88-nji minudynda pökgi Bahreýnli futbolçy Mohamed Marhoon-yň eline degdi we emin Adham Mohammad 11 metrlik jerime ugrusyna karar berdi. BAE adyna Ahmed Khalil jerime urgusyny dürüst ýerine ýetirip hasaby 1-1-e getirdi. Duşuşygyň galan wagtynda başga gol bolmanson duşuşyk 1-1 hasap bilen tamamlandy.

Bu gün bolsa A toparynda bir we B toparyndan iki duşuşyk bolup geçer. Fikstura şeýle:

Bazar güni, 6-njy Ýanwar 2019
Topar B
15:00 - AWUSTRALIÝA vs IORDANIÝA [Hazza Bin Zayed Stadiýony (Al Ain)]

Topar A
17:30 - TAÝLAND vs HINDISTAN [Al Nahyan Stadiýony (Abu Dhabi)]

Topar B
20:00 - SIRIÝA vs PALESTINA [Sharjah Stadiýony (Sharjah)]

Watanymyz Türkmenistan bolsa çarşanba güni Ýaponiýa bilen Abu Dabidäki Al Nahýan stadiýonynda sagat 15:00-da garşylarşar. Toparymyzdaky beýleki duşuşyk bolsa goňşy Özbegistan bilen Oman arasynda Şarjah şäherindäki Şarjah stadiýonynda sagat 17:30 bolup geçer. Fikstura şeýle:

Çarşanba, 9-njy Ýanwar 2019
Topar F
15:00 - ÝAPONIÝA vs TÜRKMENISTAN [Al Nahyan Stadiýony (Abu Dhabi)]

Topar F
17:30 - ÖZBEGISTAN vs OMAN [Sharjah Stadium (Sharjah)]

DOLY FIKSTURA ÜÇIN AFK-NYŇ RESMI SAÝTYŇA GÖZ AÝLAŇ: http://www.the-afc.com/asiancup/fixtures/